నటి శోభిత ధూళిపాల: తాను లెఫ్ట్ లిబరల్‌నని, కమ్యూనిజం ఎప్పటికైనా గెలుస్తుందని నమ్ముతానని వ్యాఖ్య

నటి శోభిత ధూళిపాల ఒక పాత ఇంటర్వ్యూలో చేసిన రాజకీయ వ్యాఖ్యలు తాజాగా సోషల్ మీడియాలో వైరల్ అయ్యాయి. ఆ ఇంటర్వ్యూలో తాను లెఫ్ట్ లిబరల్ అని, ప్రపంచంలో కమ్యూనిజం ఒకనాడు గెలుపొందుతుందని నమ్ముతున్నానని ఆమె చెప్పారు.

శోభిత ఆర్థిక శాస్త్రం చదువుకున్నారు. తన వ్యాఖ్యలు వివాదానికి దారి తీయొచ్చనే సంగతి తనకు తెలుసునని, అయినా తాను ఈ అభిప్రాయాలపై స్పష్టంగా ఉన్నానని ఆ ఇంటర్వ్యూలో పేర్కొన్నారు. ఈమె ప్రముఖ నటుడు అక్కినేని నాగార్జున కోడలు, నాగచైతన్య భార్య.

తెలుగు చలనచిత్ర పరిశ్రమలో గతంలో అక్కినేని నాగేశ్వరరావు, ఎన్టీ రామారావు వంటి ప్రముఖులు తమ రాజకీయ, సైద్ధాంతిక అభిప్రాయాలను బహిరంగంగా వ్యక్తం చేసేవారు. అయితే తర్వాతి తరాల నటులు రాజకీయాలకు దూరంగా ఉండటమో, తటస్థంగా వ్యవహరించడమో చూస్తున్నాం. ఈ నేపథ్యంలో శోభిత స్పష్టమైన రాజకీయ వైఖరిని బయటపెట్టడం చర్చనీయాంశమైంది.

ఈ వీడియో మళ్లీ వైరల్ కావడంతో కొందరు ఆమె భావజాలాన్ని చర్చిస్తుండగా, మరికొందరు ఆమె కుటుంబ నేపథ్యంలో ఈ వ్యాఖ్యలు విభిన్నంగా కనిపిస్తున్నాయని అభిప్రాయపడుతున్నారు. కాగా, శోభిత తన వ్యాఖ్యలపై తాజాగా స్పందించలేదు.