ఆదిలాబాద్‌లో పల్స్ పోలియో టీకా కార్యక్రమం ప్రారంభించిన కలెక్టర్ రాజార్శి షా

ఆదిలాబాద్ జిల్లా కేంద్రంలో పల్స్ పోలియో టీకా కార్యక్రమాన్ని కలెక్టర్ రాజార్శి షా ప్రారంభించారు. ఐదేళ్ల లోపు పిల్లలకు స్వయంగా పోలియో చుక్కలు వేశారు.

ఈ సందర్భంగా కలెక్టర్ మాట్లాడుతూ, పిల్లలకు తప్పకుండా పోలియో చుక్కలు వేయించాలని తల్లిదండ్రులకు విజ్ఞప్తి చేశారు. పిల్లలకు జ్వరం లేదా ఇతర అనారోగ్యం ఉన్నా చుక్కలు వేయించవచ్చని, ఈ రోజు మిస్ అయితే రేపు లేదా ఎల్లుండి వేయించుకోవచ్చని సూచించారు.

తెలంగాణ, భారతదేశం పోలియో రహిత ప్రాంతాలుగా ఉన్నప్పటికీ, పోలియో వైరస్ వ్యాప్తి చెందకుండా టీకా కొనసాగించాల్సిన అవసరం ఉందని ఆయన వివరించారు. పోలియో వైరల్ వ్యాధి కావడంతో టీకా లేకపోతే వ్యాప్తి చెందే ప్రమాదం ఉందన్నారు.

పోలియో నిర్మూలన ఉద్యమంలో ప్రతి ఒక్కరూ భాగస్వామ్యులు కావాలని, తమకు తెలిసిన వారికి కూడా టీకా వేయించేలా ప్రోత్సహించాలని కలెక్టర్ పిలుపునిచ్చారు.