ఆదిలాబాద్‌లో గణేష్ నిమజ్జన శోభాయాత్ర తిరిగి ప్రారంభం

ఆదిలాబాద్ జిల్లా కేంద్రంలో కొన్ని గంటల పాటు నిలిచిపోయిన గణేష్ నిమజ్జన శోభాయాత్ర తిరిగి ప్రారంభమైంది. పోలీసుల తీరును నిరసిస్తూ హిందూ సంఘాల నిర్వాహకులు ఉదయం శోభాయాత్రను నిలిపివేశారు.

పోలీసులు తమపై కఠినంగా ప్రవర్తించారని నిర్వాహకులు ఆరోపించారు. బ్యాండ్ వాయిద్యాలను ఆపించారని, విద్యుత్ సరఫరా నిలిపివేసి సంబరాలకు అడ్డుపడ్డారని వారు ఆవేదన వ్యక్తం చేశారు. ఈ నిరసన కొనసాగింది.

అనంతరం జిల్లా కలెక్టర్, అదిలాబాద్ ఎమ్మెల్యే పాయల్ శంకర్ అక్కడికి చేరుకున్నారు. నిర్వాహకుల డిమాండ్లపై సానుకూలంగా స్పందించడంతో వారు ఆందోళన విరమించారు.

కలెక్టర్, ఎమ్మెల్యే కొబ్బరికాయ కొట్టి శోభాయాత్రను తిరిగి ప్రారంభించారు. 11 రోజుల పూజలు అందుకున్న వినాయక విగ్రహాలను నిమజ్జనానికి తరలిస్తున్నారు. ప్రస్తుతం ఊరేగింపు కొనసాగుతోంది.