ఆగ్రాలో భర్త హత్య: శవాన్ని బాత్రూమ్ నేలలో దాచిన భార్యకు అరెస్ట్

ఉత్తరప్రదేశ్‌లోని ఆగ్రాలో 45 రోజుల కిందట అదృశ్యమైన 44 ఏళ్ల భూపేంద్ర శవం సొంత ఇంటి బాత్రూమ్ ఫ్లోరింగ్ కింద దొరకగా, అతడి భార్య రూబీని పోలీసులు అరెస్టు చేశారు. భూపేంద్ర మే నెల నుంచి కనిపించకుండా పోయాడని, భార్య ఇరుగుపొరుగు, బంధువులతో చెబుతూ వచ్చింది. కానీ పోలీసులకు ఆమె ప్రవర్తనపై అనుమానం రావడంతో ఇంట్లో సోదాలు నిర్వహించగా, ఫ్రెష్‌గా ప్లాస్టర్ చేసిన బాత్రూమ్ ఫ్లోరింగ్‌ను బద్దలుకొట్టి శవాన్ని బయటకు తీశారు. దాదాపు 45 రోజులుగా ఈ మృతదేహం అక్కడే దాగి ఉన్నట్లు పోలీసులు తెలిపారు. ఈ ఘటనపై కేసు నమోదు చేసుకున్న పోలీసులు హత్య, ఆధారాలను నాశనం చేసిన ఆరోపణలపై రూబీని అరెస్ట్ చేశారు. సంఘటనా స్థలానికి ఫోరెన్సిక్ బృందాలను పిలిపించి, మృతదేహాన్ని పోస్ట్‌మార్టం పరీక్షకు పంపించారు. మృతికి గల ఖచ్చితమైన కారణం ఫోరెన్సిక్ నివేదికలో వెలువడుతుందని అధికారులు చెప్పారు. గత మే 26న సికంద్రా పోలీస్ స్టేషన్‌లో సురేంద్ర శర్మ అనే వ్యక్తి భూపేంద్ర మిస్సింగ్ పిటిషన్ దాఖలు చేశారు. ఈ కేసు దర్యాప్తు చేపట్టిన పోలీసులు భార్యే హత్య చేసి మృతదేహాన్ని బాత్రూమ్‌లో పూడ్చి, పైన ఫ్లోరింగ్ వేయించినట్లు గుర్తించారు. ప్రస్తుతం నిందితురాలిని కస్టడీలోకి తీసుకుని విచారిస్తున్న పోలీసులు హత్యకు గల కారణాలు, ఎవరైనా సహాయం చేశారా అనే కోణంలో దర్యాప్తు చేస్తున్నారు. ఫోన్ రికార్డులు, కుటుంబ సభ్యులు, చుట్టుపక్కల వారిని ప్రశ్నిస్తూ ఆధారాలు సేకరిస్తున్నారు.