అగ్రి వర్సిటీ వీసీ జానయ్యపై ఆరోపణలు: విచారణ పూర్తి చేసిన మహిళా కమిషన్

తెలంగాణ వ్యవసాయ విశ్వవిద్యాలయం వీసీ జానయ్యపై లైంగిక వేధింపుల ఆరోపణలపై మహిళా కమిషన్ విచారణ పూర్తి చేసింది. ఇరువర్గాలను మరోసారి విచారించాలని కమిషన్ నిర్ణయించింది.

విచారణకు వీసీ జానయ్య తన న్యాయవాదితో కలిసి హాజరయ్యారు. ఫిర్యాదు చేసిన మహిళా అసిస్టెంట్ ప్రొఫెసర్ కూడా హాజరయ్యారు. ఇరువర్గాల నుంచి వేరువేరుగా వివరణలు తీసుకున్నట్లు కమిషన్ తెలిపింది.

ఆధారాలు లేకుండా నిర్ధారణకు రావడం సాధ్యం కాదని కమిషన్ పేర్కొంది. అందుకే మరిన్ని ఆధారాలు సమర్పించాలని బాధిత మహిళను కోరినట్లు చైర్‌పర్సన్ నేరెళ్ల శారద తెలిపారు. ఒకరిపై నిందలు వేసే ముందు నిజానిజాలు తెలుసుకోవాలని ఆమె అన్నారు. వ్యక్తిగతంగా టార్గెట్ చేసి తప్పుడు ఆరోపణలు చేసే వారికి కమిషన్ అండగా ఉండదని స్పష్టం చేశారు.

ఇదిలా ఉండగా, హైదరాబాద్ ఇందిరా పార్క్ ధర్నా చౌక్‌లో ఉద్రిక్తత చోటు చేసుకుంది. బాధిత మహిళకు మద్దతుగా పలు ఉద్యోగ సంఘాలు ఆందోళన చేపట్టాయి. సమగ్రంగా విచారణ జరపాలని కొందరు మహిళా ఉద్యోగులు పోలీసులను కోరారు. అదే సమయంలో వీసీ జానయ్యకు మద్దతుగా మరికొందరు ఆందోళన చేపట్టారు. ఇరువర్గాల మధ్య వాగ్వాదం జరిగింది. తోపులాటలో ఓ అసిస్టెంట్ ప్రొఫెసర్‌కు స్వల్ప గాయాలయ్యాయి. వీసీ మద్దతుదారులను పోలీసులు అదుపులోకి తీసుకుని పోలీస్ స్టేషన్‌కు తరలించారు.

వీసీ జానయ్యపై ప్రభుత్వం చర్యలు తీసుకోవాలని ఉద్యోగ సంఘాల నేతలు డిమాండ్ చేశారు. ఆయనపై పలువురు ఆరోపణలు చేస్తున్నారని వారు చెప్పారు. కమిషన్ ఇరువర్గాలను రెండోసారి విచారించనుంది.