విద్యుత్ చోరీ పట్టుకోవడానికి స్మార్ట్ మీటర్ డేటాపై AI విశ్లేషణ

విద్యుత్ చోరీని గుర్తించేందుకు స్మార్ట్ మీటర్ల డేటాను AI ద్వారా విశ్లేషించే విధానాన్ని కేంద్ర విద్యుత్ శాఖ పరిధిలోని సెంట్రల్ ఎలక్ట్రిసిటీ అథారిటీ (CEA) తన డిజిటలైజేషన్ ఫ్రేమ్‌వర్క్‌లో ప్రతిపాదించింది.

స్మార్ట్ మీటర్ల నుంచి వచ్చే డేటాను AI నిరంతరం విశ్లేషిస్తుంది. మీటర్ ట్యాంపరింగ్ లేదా బైపాస్ కనెక్షన్ల వల్ల సాధారణ వినియోగానికి భిన్నంగా రీడింగ్‌లు నమోదైతే వెంటనే గుర్తిస్తుంది. అనుమానిత ప్రాంతాల వివరాలను అధికారులకు పంపుతుంది. దీంతో విజిలెన్స్ సిబ్బంది ఖచ్చితమైన ప్రాంతాల్లో తనిఖీలు చేపట్టవచ్చు.

బీహార్‌లో ఈ విధానాన్ని ప్రయోగాత్మకంగా అమలు చేశారు. ఒక నెలలోనే 136 అనుమానిత కేసులను గుర్తించారు. క్షేత్రస్థాయి తనిఖీలో 57 శాతం కేసుల్లో విద్యుత్ చోరీ జరిగినట్లు నిర్ధారణ అయింది.

ఫీడర్ స్థాయి నుంచి పవర్ కమాండ్ కంట్రోల్ రూమ్‌కు డేటా చేరుతోంది. సిబ్బంది ఫీడర్‌లపై అనాలిటిక్స్ ఉపయోగించి లోడ్ పెరుగుదలను మానిటర్ చేస్తున్నారు. ఎక్కడైనా అక్రమ వినియోగం లేదా చోరీ జరిగితే దానిని కూడా గుర్తించగలమని ఓ అధికారి తెలిపారు.

గతంతో పోలిస్తే తెలంగాణలో పవర్ డ్రిఫ్ట్ తగ్గింది. అయినా మరింత పారదర్శకత కోసం ఈ విధానం ఉపయోగపడుతుందని అధికారి చెప్పారు. నిజాయితీగా విద్యుత్ వాడే వినియోగదారులకు నాణ్యమైన సరఫరా ఇవ్వడం తమ బాధ్యత అని ఆయన అన్నారు. చోరీ ద్వారా విద్యుత్ వాడే వారిపై చట్టపరమైన చర్యలు తీసుకుంటామని తెలిపారు.

AI విధానం అమలైతే డిస్కమ్‌ల ఆర్థిక నష్టాలు తగ్గుతాయి. వేసవిలో పీక్ డిమాండ్ సమయంలోనూ అంతరాయాలు లేకుండా సరఫరా చేయవచ్చని అంచనా.