అయ్యప్ప మాలతో డబ్బు అడిగిన ఇద్దరు.. గ్రామస్తుల నిలదీతతో పరారీ

జనగామ జిల్లా పాలకూర్తి మండలం మల్లంపేల్లి గ్రామంలో అయ్యప్ప మాల వేసుకున్న ఇద్దరు వ్యక్తులు ఇళ్లకు వెళ్లి డబ్బు అడిగిన ఘటన వెలుగులోకి వచ్చింది.

స్థానికులు తెలిపిన వివరాల ప్రకారం, ఆ ఇద్దరు ఇంటింటికి తిరుగుతూ శబరిమలకు వెళ్లేందుకు సహాయం చేయాలని కోరారు. ఎవరు ఎంత ఇస్తే అంత తీసుకుంటామని చెప్పి ఒక్కో ఇంట్లో ₹150 అడిగినట్టు తెలుస్తోంది.

ఒక ఇంట్లో మాత్రం వారు మరోలా మాట్లాడారు. మీ ఇంటికి ఏదో శక్తి తిరుగుతోందని, పూజ చేసి దాన్ని తరిమేస్తామని చెప్పారు. పూజ కోసం ఇంట్లో ఉన్న డబ్బు, బంగారం మొత్తం తీసుకొచ్చి ముందు పెట్టాలని కోరినట్టు స్థానికులు చెప్తున్నారు. మంత్రజలం చల్లితే ఇంటికి కీడు చేసే శక్తి పారిపోతుందని కూడా వారు చెప్పినట్టు తెలుస్తోంది.

ఇంటి యజమాని వెంటనే వారిని ప్రశ్నించారు. మీరు ఎవరని నిలదీశారు. ఆ చప్పుడు విని గ్రామస్తులు గుమిగూడారు. అయ్యప్ప మాల వేసుకుని వచ్చి ఇలాంటి పనులు చేస్తున్నారా అని వారు ప్రశ్నించారు. దాంతో తప్పు జరిగిందని చెప్పి ఆ ఇద్దరు అక్కడి నుంచి పారిపోయినట్టు స్థానికులు తెలిపారు.