లోక్‌సభలో అఖిలేష్ యాదవ్: నీట్ పేపర్ లీక్‌లపై ప్రభుత్వ జవాబుదారీతనం డిమాండ్

సమాజ్‌వాదీ పార్టీ చీఫ్ అఖిలేష్ యాదవ్ లోక్‌సభలో మాట్లాడుతూ నీట్ పేపర్ లీక్‌లపై కేంద్ర ప్రభుత్వంపై తీవ్ర విమర్శలు చేశారు. నీట్ పరీక్ష పేపర్ లీకేజీలు పదేపదే జరుగుతున్నాయని, ప్రభుత్వం విద్యా రంగంపై దాడి చేస్తోందని ఆరోపించారు. యూత్ ఆందోళనతో ప్రభుత్వం తలవంచాల్సి వచ్చిందని, మంత్రి రాజీనామా చేయాలన్న డిమాండ్‌ను అంగీకరించిందని చెప్పారు.

"ఝుకానే వాలా చాహియే, సర్కార్ భీ ఝుక్తీ హై" అనే నినాదాన్ని ప్రస్తావిస్తూ, యువత ఐక్యతతో ప్రభుత్వాన్ని వంచగలిగారని ఆయన అన్నారు. నీట్ పేపర్ లీక్ కేవలం ఒకటి రెండు సార్లు కాదని, పదేపదే జరిగాయని ఆయన ఎత్తిచూపారు. గత 10 ఏళ్ల బీజేపీ పాలనలో 20కి పైగా పరీక్షల పేపర్లు లీకయ్యాయని ఆరోపించారు. వాటిలో యూపీటెట్, దరోగా భర్తీ, జూనియర్ ఇంజినీరింగ్, పంచాయతీ అధికారి, ఇంటర్మీడియట్ బోర్డు పరీక్షలు ఉన్నాయని వివరించారు.

పేపర్ లీకేజీలను నిరోధించే చట్టం తెచ్చినా ఫలితం లేదని, ఎన్టీఏ సంస్థను కూడా ప్రభుత్వం అవుట్‌సోర్స్ చేసిందని విమర్శించారు. దీనివల్ల పరీక్షల నిర్వహణలో పారదర్శకత లేదన్నారు.

విద్యా రంగంపై ప్రభుత్వం చేస్తున్న దాడుల్లో భాగంగా లక్షకు పైగా ప్రాథమిక పాఠశాలలు మూసివేశారని, ముఖ్యంగా ఉత్తరప్రదేశ్‌లో 26,386 ప్రభుత్వ ప్రాథమిక పాఠశాలలు బంద్ అయ్యాయని తెలిపారు. 69,000 మంది టీచర్ల నియామకంలో కుంభకోణం జరిగిందని, దీనివల్ల అత్యధికంగా వెనుకబడిన, దళిత వర్గాలకు చెందిన అభ్యర్థులు నష్టపోయారని ఆరోపించారు.

నీట్ పరీక్ష లీక్ కారణంగా ఆత్మహత్య చేసుకున్న విద్యార్థినులకు సంతాపం తెలిపిన అఖిలేష్, వారి కుటుంబాలకు కోటి రూపాయల పరిహారం ఇవ్వాలని డిమాండ్ చేశారు. ప్రభుత్వ నియత్ సరిగా లేనందునే పరీక్షలు లీకవుతున్నాయని, దేవాలయాల్లో కానుకలు కూడా చోరీ అయ్యాయని వ్యాఖ్యానించారు. "నియత్ మారితేనే పరీక్షలు స్వచ్ఛంగా జరుగుతాయి" అని ఆయన తన ప్రసంగం ముగించారు.