అనంతపురం జిల్లాలో కూటమి సీట్ల పంచాయతీ కొలిక్కి రావడం లేదు

ఉమ్మడి అనంతపురం జిల్లాలో కూటమి పార్టీల మధ్య ఎంపీటీసీ, జెడ్పీటీసీ సీట్ల పంచాయతీ ఇంకా కొలిక్కి రాలేదు. జనసేన, బీజేపీలు తమకు కేటాయించాలని కోరుతున్న స్థానాలపై టీడీపీ నేతలు స్పష్టమైన సమాధానం ఇవ్వలేదు. దీంతో పలు చోట్ల ఆశావహులు అయోమయంలో ఉన్నారు.

అనంతపురం, శ్రీ సత్యసాయి జిల్లాల్లో జనసేన 12 జెడ్పీటీసీ స్థానాలు కోరుతోంది. రెండు జిల్లాల్లో కలిపి 60కి పైగా ఎంపీటీసీ స్థానాలు అడుగుతోంది. అయితే ఒక్కో చోట రెండు, మూడు స్థానాలకు మించి ఇవ్వలేమని టీడీపీ నేతలు చెప్తున్నారు.

టీడీపీ అభ్యర్థులు ఏకగ్రీవంగా గెలిచిన ఎంపీటీసీ స్థానాలను తమకు కేటాయించాలని, ఆ చోట్ల నామినేషన్ వేసిన జనసేన, బీజేపీ అభ్యర్థులు కోరుతున్నారు. ఇప్పటికే ఏకగ్రీవమైన స్థానాలను ఇవ్వడం వీలుకాదని టీడీపీ నేతలు చెప్తున్నారు. మున్సిపల్ ఎన్నికల సమయంలోనూ ఇదే జాప్యం జరిగింది. కొన్ని చోట్ల కూటమిలోని రెండు పార్టీల అభ్యర్థులు ఒకే స్థానంలో పోటీ చేశారు.

మధ్యాహ్నం మూడు గంటల్లోగా బీ ఫారాలు ఇవ్వకపోతే మిత్రపక్షాలే జెడ్పీ ఎన్నికల్లో పోటీ పడాల్సి ఉంటుందని చర్చ జరుగుతోంది. ఎవరికి బీ ఫారం ఇస్తారో తెలియక ఆశావహులు ప్రచారానికి వెళ్లలేకపోతున్నారు. కొందరిని నాయకులు బుజ్జగించి నామినేషన్లు విరమింపజేస్తున్నారు.

ఈ విషయంపై మంత్రి సత్యకుమార్, 20 సూత్రాల అమలు కమిటీ చైర్మన్ లంకా దినకర్ అనంతపురంలో టీడీపీ నేతలతో చర్చలు జరుపుతున్నారు. బీజేపీ కూడా ఏకగ్రీవంగా గెలిచిన స్థానాలను కోరుతున్నట్లు సమాచారం ఉంది.