అనంతపురం జడ్పీ చైర్మన్ అభ్యర్థిగా గంజి నాగరాజు ఖరారు

అనంతపురం జిల్లా పరిషత్ చైర్మన్ అభ్యర్థిగా డాక్టర్ గంజి నాగరాజు పేరును TDP అధిష్టానం ఖరారు చేసింది. గార్లదిన్న ZPTC స్థానానికి ఆయనకు B-ఫారం అందజేసింది.

జడ్పీ చైర్మన్ పదవికి గార్లదిన్న ZPTC స్థానం కీలకమైంది. ఈ స్థానం నుంచి గెలిచే వారికే చైర్మన్ పదవి దక్కుతుందని పార్టీ వర్గాలు చెబుతున్నాయి. దాదాపు నెల రోజులుగా ఈ స్థానం కోసం పార్టీలో పోటీ నడిచింది.

BC సామాజిక వర్గానికి చెందిన ఆరుగురు ఈ స్థానం నుంచి పోటీ పడ్డారు. వారంతా నామినేషన్లు వేశారు. చివరి రోజున విత్‌డ్రా చేయడంతో అధిష్టానం నాగరాజు పేరును ప్రకటించింది.

సింగనమల ఎమ్మెల్యే బండారు శ్రావణి చేతుల మీదుగా నాగరాజు B-ఫారం తీసుకున్నారు. ఇవాళ ఎన్నికల అధికారికి ఆయన దానిని సమర్పించారు. దీంతో ఆయన అభ్యర్థిత్వం అధికారికమైంది.

నాగరాజు శ్రీకృష్ణదేవరాయ విశ్వవిద్యాలయం నుంచి పొలిటికల్ సైన్స్‌లో డాక్టరేట్ పొందారు. లా కూడా పూర్తి చేశారు. విద్యార్థి దశ నుంచి BC ఉద్యమాల్లో పాల్గొన్నారు. 1983 నుంచి పార్టీలో కొనసాగుతున్నారు. ప్రస్తుతం TDP రాష్ట్ర BC సెల్ ప్రధాన కార్యదర్శిగా ఉన్నారు.

ఈ పదవి కోసం రాయదుర్గం ఎమ్మెల్యే కాలువ శ్రీనివాసులు, హిందూపురం ఎంపీ తమ అనుచరులకే అవకాశం ఇవ్వాలని కోరినట్టు పార్టీ వర్గాలు చెబుతున్నాయి. చివరకు కాలువ శ్రీనివాసులు మద్దతుతో నాగరాజు పేరు ఖరారైంది.