అల్వాల్‌లో భారీ చోరీ: 29 తులాల బంగారం, ₹20 వేల నగదు అపహరణ

మేడ్చల్ జిల్లా అల్వాల్ పోలీస్ స్టేషన్ పరిధిలోని జానకి నగర్‌లో భారీ చోరీ జరిగింది. తాళం వేసిన ఇంట్లోకి చొరబడిన దుండగులు 29 తులాల బంగారం, 28 గ్రాముల వెండి, ₹20,000 నగదు తీసుకెళ్లారు.

కుటుంబ సభ్యులు బంధువుల పెళ్లికి వెళ్లేందుకు ఇంటికి తాళం వేశారు. ఆ సమయంలోనే ఈ చోరీ జరిగినట్టు పోలీసులు భావిస్తున్నారు. ఇంట్లో చోరీ జరిగిందని గమనించిన స్థానికులు కుటుంబ సభ్యులకు సమాచారం ఇచ్చారు.

హుటాహుటిన ఇంటికి చేరుకున్న కుటుంబ సభ్యులు వస్తువులు చల్లాచెదురుగా పడి ఉండడాన్ని చూశారు. చోరీ జరిగినట్టు నిర్ధారించుకున్న తర్వాత పోలీసులకు సమాచారం అందించారు. బాధితులు తెలిపిన వివరాల ఆధారంగా అల్వాల్ పోలీసులు కేసు నమోదు చేశారు.

ఘటనాస్థలానికి చేరుకున్న పోలీసులు దర్యాప్తు చేపట్టారు. సమీపంలోని సీసీ కెమెరాల ఫుటేజీని పరిశీలిస్తున్నారు. క్లూస్ టీమ్స్ సహాయంతో ఆధారాలు సేకరిస్తున్నారు.

ఇంటికి తాళం వేసిన కొద్ది నిమిషాల్లోనే చోరీ జరిగి ఉంటుందని పోలీసులు అనుమానిస్తున్నారు. దుండగులను గుర్తించేందుకు దర్యాప్తు కొనసాగుతోంది.