కామారెడ్డి, నిజామాబాద్‌లో భూగర్భ జలాలు పతనం; కరువు మండలాలుగా ప్రకటన

కామారెడ్డి, నిజామాబాద్ జిల్లాల్లోని పలు మండలాల్లో భూగర్భ జలాల మట్టం గత ఏడాదితో పోలిస్తే గణనీయంగా పడిపోయింది. ఈ మండలాలను కరువు మండలాలుగా ప్రభుత్వం ప్రకటించింది.

భూగర్భ జలాల గణాంకాలు ఈ కొరతను స్పష్టం చేస్తున్నాయి. పెద్దరుసేగావు గ్రామంలో గత ఏడాది 1.18 మీటర్ల లోతులో ఉన్న నీటి మట్టం ఈ ఏడాది 2.48 మీటర్లకు చేరింది. కామారెడ్డి జిల్లా మేనూరులో 4.79 మీటర్ల నుంచి 8.65 మీటర్ల లోతుకు పడిపోయింది. సోమూరు గ్రామంలో 1.99 మీటర్ల నుంచి ఏకంగా 15.32 మీటర్లకు చేరుకుంది.

వర్షాకాలంలో ఆశించిన స్థాయిలో వర్షాలు కురవకపోవడం ప్రధాన కారణం. గతంలో వర్షాకాలం రాగానే చెరువులు, కుంటలు నిండుగా ఉండేవి. ఈసారి ఆ పరిస్థితి లేదు. దీంతో భూగర్భ జలాల మట్టం పెద్దగా మెరుగుపడలేదు. పంటల సాగు కోసం బోర్లు, బావుల నుంచి భారీగా నీరు తోడుతుండడంతో జలమట్టం మరింత లోతుకు పోతోంది.

వానాకాలం పంటల సాగు ఇప్పటికే బోర్లు, బావులపై ఒత్తిడి పెంచింది. ఇప్పుడు రబీ సీజన్ దగ్గరపడుతోంది. సాగునీరు ఎక్కడి నుంచి సమకూర్చుకోవాలన్న ఆందోళన రైతుల్లో ఉంది. మోటార్లు పనిచేస్తాయా, కరెంట్ ఇస్తారా, బోర్లలో నీరు సరిపోతుందా అన్న సందేహాలు వ్యక్తమవుతున్నాయి. బోర్లపై ఆధారపడి వ్యవసాయం చేసే రైతులకు రానున్న సీజన్ సవాలుగా మారనుంది.

వర్షాభావ పరిస్థితుల నేపథ్యంలో ఆరుతడి పంటలు వేయాలని ప్రభుత్వం సూచిస్తోంది. కరెంట్, సాగునీటి వసతులపై స్పష్టత ఇవ్వకపోవడంతో రైతుల ఆందోళన కొనసాగుతోంది.