ఢిల్లీ టీటీడీ ఆలయంలో తొలిసారిగా పవిత్రోత్సవాలు ప్రారంభం

న్యూఢిల్లీలోని టీటీడీ శ్రీ వెంకటేశ్వర స్వామి ఆలయంలో తొలిసారిగా వార్షిక పవిత్రోత్సవాలు ప్రారంభమయ్యాయి. నాలుగు రోజుల పాటు, నవంబర్ 1 వరకు ఈ ఉత్సవాలు జరగనున్నాయి.

తొలి రోజు అర్చకులు శాస్త్రోక్తంగా అంకురార్పణ కార్యక్రమాన్ని నిర్వహించారు. పవిత్ర ప్రతిష్ఠ, స్నపనం, తిరుమంజన కార్యక్రమాలు కూడా నిర్వహించారు.

ఈ కార్యక్రమానికి ఢిల్లీ ఉపముఖ్యమంత్రి పర్వేశ్ వర్మ, BJP జాతీయ ప్రధాన కార్యదర్శి బీఎల్ సంతోష్, ఆలయ చైర్మన్ సుమంత్ రెడ్డి హాజరయ్యారు.

అక్టోబర్ 31న పవిత్ర సమర్పణ జరుగుతుంది. నవంబర్ 1న మహా పూర్ణాహుతి, చక్రస్నానం నిర్వహిస్తారు. చివరి రోజు సాయంత్రం స్వామి వారి తిరుచ్చి ఉత్సవం నాలుగు మాడ వీధుల్లో జరగనుంది.

గత 12 ఏళ్లుగా ఈ ఆలయంలో బ్రహ్మోత్సవాలు నిర్వహిస్తున్నారు. ఈ ఏడాది తొలిసారిగా పవిత్రోత్సవాలను టీటీడీ బోర్డు ఏర్పాటు చేసింది. నిత్య అర్చనలు, ఆర్జిత సేవలు, వారోత్సవాలు, పక్షోత్సవాలు, మాసోత్సవాలు, బ్రహ్మోత్సవాల్లో జరిగే దోషాల నివారణ కోసం ఈ ఉత్సవాలు నిర్వహిస్తారు. యాగశాలలో ఆగమ శాస్త్రం ప్రకారం విశేష హోమాలు, పవిత్ర సమర్పణ, పూర్ణాహుతి తదితర క్రతువులు జరగనున్నాయి.