ఖమ్మం, భద్రాద్రిలో అర్ణబ్ తుఫాను ప్రభావం: వేల ఎకరాల్లో పంట నష్టం

ఖమ్మం, భద్రాద్రి కొత్తగూడెం జిల్లాల్లో అర్ణబ్ తుఫాను ప్రభావంతో కురిసిన భారీ వర్షాలకు వేల ఎకరాల్లో వరి, పత్తి పంటలు నష్టపోయాయి. కోత దశలో ఉన్న పంట నీటిలో మునిగిపోవడంతో రైతులు తీవ్ర ఇబ్బందులు ఎదుర్కొంటున్నారు.

బోనకల్లు, ఎర్రుపాలెం, వేంసూరు, సత్తుపల్లి, మధిర, కల్లూరు మండలాల్లో ఎడతెరిపి లేకుండా వర్షాలు కురిశాయి. కల్లూరు సహా పలు ప్రాంతాల్లో సుమారు 8,000 ఎకరాల్లో కోతకు వచ్చిన వరి ఈదురుగాలులకు నేలకూలింది. నేలకొండపల్లి, కోసుమంచి, కొనిజర్ల మండలాల్లోనూ వరి చేలకు నష్టం జరిగింది.

రెండు జిల్లాల్లో కలిపి దాదాపు 2.30 లక్షల ఎకరాల్లో పత్తి సాగు చేశారు. దాదాపు 12-13 మండలాల్లో పత్తి తడిసి ముద్దగా మారింది. రైతులు ఇప్పటికే రెండు సార్లు పత్తి ఏరారు. మూడో దఫా కోతకు సిద్ధంగా ఉన్న పంట వర్షాలకు పనికిరాకుండా పోయింది. పత్తి రంగు మారుతోందని రైతులు ఆందోళన వ్యక్తం చేస్తున్నారు.

ఈ ఏడాది జాతీయ, అంతర్జాతీయంగా పత్తికి డిమాండ్ ఉండడంతో మంచి ధర పలుకుతోంది. ఎల్ నినో ప్రభావంతో దిగుబడి తగ్గింది. ధర బాగుండడంతో పంటపై పెట్టిన పెట్టుబడి తిరిగి వస్తే చాలని రైతులు భావిస్తున్నారు.

భద్రాద్రి జిల్లాలోని ఇల్లందు, అశ్వారావుపేట, టేకులపల్లి, భద్రాచలం, బూర్గంపాడు తదితర మండలాల్లో మోస్తరు వర్షం కురిసింది. రెండు రోజులు అధికంగా, ఒక రోజు సాధారణంగా తుఫాను ప్రభావం ఉండింది.

నష్టం ఎంత జరిగింది, ఎంతమంది రైతులు నష్టపోయారనే లెక్కలను ప్రభుత్వం అధికారికంగా వెల్లడించాలని రైతులు కోరుతున్నారు. తమకు పరిహారం చెల్లిస్తే తప్ప ఈసారి అప్పుల నుంచి గట్టెక్కలేమని పత్తి రైతులు చెప్తున్నారు. జిల్లా మంత్రులు బాధ్యతగా వ్యవహరించి ఆదుకోవాలని అన్నదాతలు అభ్యర్థిస్తున్నారు. రాష్ట్ర ప్రభుత్వం నుంచి ఇంతవరకు ఎలాంటి స్పందన రాలేదని రైతులు ఆరోపిస్తున్నారు. ఈ విషయంపై ప్రభుత్వం స్పందన తెలియాల్సి ఉంది.