ధర్మవరం మున్సిపల్ ఎన్నికల్లో ప్రశాంత పోలింగ్, మధ్యాహ్నానికి 50 శాతం ఓటింగ్

శ్రీ సత్యసాయి జిల్లా ధర్మవరంలో మున్సిపల్ ఎన్నికల పోలింగ్ ప్రశాంతంగా కొనసాగుతోంది. మధ్యాహ్నం 12 గంటల వరకు దాదాపు 40 నుంచి 50 శాతం ఓటింగ్ నమోదైందని అధికారులు తెలిపారు. సాయంత్రం 5 గంటలకు పోలింగ్ ముగిసే సరికి 80 నుంచి 85 శాతం ఓటింగ్ నమోదయ్యే అవకాశం ఉందని అంచనా వేస్తున్నారు.

నామినేషన్ల సమయంలో చోటు చేసుకున్న ఘర్షణల నేపథ్యంలో జిల్లా ఎస్పీ సతీష్ కుమార్ ప్రత్యేక భద్రతా ఏర్పాట్లు చేపట్టారు. ఆయన స్వయంగా పోలింగ్ కేంద్రాలను సందర్శించి పర్యవేక్షించారు. ధర్మవరంలో సెక్షన్ 144, పోలీస్ చట్టం 30వ సెక్షన్ అమల్లో ఉన్నాయి. ఎలాంటి అవాంఛనీయ ఘటనలు జరగకుండా పటిష్ట పోలీసు బందోబస్తు ఏర్పాటు చేశారు.

ఉమ్మడి అనంతపురం జిల్లాలోని 11 నగర పంచాయతీలు, ఒక కార్పొరేషన్‌లో ఈరోజు ఎన్నికలు జరుగుతున్నాయి. వీటిలో గుత్తి ఏకగ్రీవమైంది. మిగిలిన 10 చోట్ల పోలింగ్ జరుగుతోంది. తాడిపత్రిలో మొత్తం 42 వార్డులకు గాను 30 వార్డులు ఏకగ్రీవమయ్యాయి. మిగిలిన 12 వార్డుల్లో ఓటింగ్ జరుగుతోంది.

ఓటర్లకు ఇబ్బంది కలగకుండా పోలింగ్ కేంద్రాల్లో మంచినీటి సౌకర్యం, వైద్య బృందాన్ని అధికారులు ఏర్పాటు చేశారు. పోలింగ్, కౌంటింగ్ సమయంలో ఎలాంటి సమస్య తలెత్తకూడదని ఎస్పీ పోలీసు అధికారులకు ఆదేశాలు జారీ చేశారు. సాయంత్రం 5 గంటలకు పోలింగ్ ముగుస్తుంది. ఆ తర్వాత కౌంటింగ్ జరుగుతుంది.