అమర్‌నాథ్ నుంచి తిరిగొస్తున్న బస్సు ఇంటిపైకి దూసుకెళ్లి 39 మంది గాయం

జమ్మూ కాశ్మీర్ లోని గాండర్‌బల్ జిల్లా కంగన్ సమీపంలో మంగళవారం అమర్‌నాథ్ యాత్రికుల బస్సు ప్రమాదానికి గురైంది. డ్రైవర్ నియంత్రణ కోల్పోవడంతో బస్సు రోడ్డు పక్కనున్న ఓ ఇంటిపైకి దూసుకెళ్లింది. ఈ ఘటనలో 39 మంది యాత్రికులు గాయపడ్డారు.

ఇంటిపై బస్సు ఆగిపోవడంతో అది సింధూ నదిలోకి పడకుండా పెను ప్రమాదం తప్పింది. గాయపడిన వారిని వెంటనే స్థానిక ఆసుపత్రికి తరలించి చికిత్స అందిస్తున్నారు.

జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా ఘటనపై సమీక్షించి, క్షతగాత్రులకు మెరుగైన వైద్యం అందించాలని అధికారులను ఆదేశించారు. ఇదిలా ఉండగా మరో 3029 మంది భక్తులతో కూడిన కొత్త బృందం మంగళవారం తెల్లవారుజామున జమ్మూ నుంచి అమర్‌నాథ్ యాత్రకు బయలుదేరింది.

జులై 3న ప్రారంభమైన అమర్‌నాథ్ యాత్ర ఆగస్టు 28 వరకు కొనసాగనుంది. సోమవారం నాటికి 4.22 లక్షల మందికి పైగా భక్తులు అమర్‌నాథ్ స్వామిని దర్శించుకున్నట్లు అధికారులు తెలిపారు.