అమర్నాథ్ యాత్ర 2026 ప్రారంభం: ప్రధాని మోడీ భక్తులకు లేఖలో ఐదు సంకల్పాల పిలుపు

అమర్నాథ్ యాత్ర 2026 నేడు అధికారికంగా ప్రారంభమైంది. హిమాలయాల్లోని పవిత్ర అమర్నాథ్ గుహలో మంచు శివలింగ దర్శనం కోసం వేలాది మంది భక్తులు బేస్ క్యాంపుల నుంచి బయలుదేరారు. ఈ యాత్ర 57 రోజుల పాటు కొనసాగనుంది.

అనంతనాగ్ జిల్లాలో 48 కిలోమీటర్ల పహల్గాం మార్గం, గంధర్పాల్ జిల్లాలో 14 కిలోమీటర్ల బాల్తాల్ మార్గం ద్వారా ఏకకాలంలో యాత్ర ఆరంభమైంది. భద్రతా ఏర్పాట్లు పటిష్టంగా ఉన్నాయి.

యాత్ర ప్రారంభం సందర్భంగా ప్రధాని నరేంద్ర మోడీ భక్తులకు ఒక లేఖ రాశారు. ఈ లేఖలో భారతీయ ఆధ్యాత్మిక సంప్రదాయాన్ని, సాంస్కృతిక ఐక్యతను ప్రతిబింబించే ఈ యాత్ర సురక్షితంగా సాగాలని ఆయన ఆకాంక్షించారు.

ప్రధాని మోడీ భక్తులకు ఐదు సంకల్పాలు స్వీకరించాలని పిలుపునిచ్చారు. అవి - హిమాలయాల సహజ సౌందర్యాన్ని కాపాడటం, భద్రత పాటించడం, స్థానిక వ్యాపారులకు మద్దతు ఇవ్వడం, కుటుంబ సభ్యుల పేరు మీద ఒక మొక్క నాటడం, ఏడాది పొడవునా నేషన్ ఫస్ట్ భావనతో బాధ్యతలు నిర్వహిస్తూ వికసిత్ భారత్ నిర్మాణంలో భాగస్వాములు కావడం. అలాగే ఈ యాత్ర సనాతన ధర్మం, దేశ సమగ్రతకు ఒక వేడుకగా మారుతుందని ఆ లేఖలో విశ్వాసం వ్యక్తం చేశారు.

ఆగస్ట్ 28న రక్షాబంధన్ రోజున యాత్ర ముగుస్తుంది. ప్రస్తుతం కట్టుదిట్టమైన భద్రత మధ్య యాత్ర కొనసాగుతోంది.