అమర్నాథ్ యాత్రలో తొలి నాలుగు రోజుల్లో 56 వేల మందికి పైగా భక్తులు దర్శనం

జూలై 3న ప్రారంభమైన అమర్నాథ్ యాత్రలో తొలి నాలుగు రోజుల్లోనే 56,961 మంది భక్తులు పవిత్ర మంచు శివలింగాన్ని దర్శించుకున్నారు. ఆదివారం (జూలై 6) ఒక్కరోజే 24,648 మంది భక్తులు దర్శనం చేసుకోగా, అంతకుముందు రెండు రోజుల్లో 32,313 మంది గుహను సందర్శించారు.

అనంతనాగ్ జిల్లాలోని పహల్గాం (48 కి.మీ), గండర్బల్ జిల్లాలోని బాల్తాల్ (14 కి.మీ) మార్గాల ద్వారా యాత్ర కొనసాగుతోంది. భక్తుల భారీ రద్దీతో రెండు మార్గాల్లోనూ రిజిస్ట్రేషన్ స్లాట్లు జూలై 9 వరకు నిండిపోయాయని అధికారులు తెలిపారు. నమోదు చేసుకోని భక్తులు కొన్ని రోజులు యాత్రను వాయిదా వేసుకోవాలని సూచించారు. జమ్మూలోని టోకెన్ రిజిస్ట్రేషన్ కేంద్రాల వద్ద ఆదివారం 5,000 మంది నమోదు చేసుకోగా, వారిని వివిధ తేదీల్లో సర్దుబాటు చేసినట్టు అధికారులు వెల్లడించారు.

57 రోజుల పాటు సాగే ఈ యాత్ర శ్రావణ పౌర్ణమి (రాఖీ పౌర్ణమి) రోజున ముగుస్తుంది. ఆదివారం గుహ పరిసరాల్లో మేఘావృత వాతావరణం ఉన్నప్పటికీ, యాత్ర ఎలాంటి ఆటంకాలు లేకుండా సాగింది.