అచ్యుతాపురంలో కోటి తలంబ్రాల వరి సాగు ప్రారంభం

శ్రీరామనవమి సందర్భంగా సీతారాముల కళ్యాణానికి కోటి తలంబ్రాలు సిద్ధం చేసేందుకు తూర్పుగోదావరి జిల్లా గోకవరం మండలం అచ్యుతాపురంలో వరి సాగు ప్రారంభమైంది.

కోరుకొండ శ్రీకృష్ణ చైతన్య సంఘం అధ్యక్షుడు కళ్యాణం అప్పారావు నేతృత్వంలో ఈ కార్యక్రమం జరిగింది. భద్రాచలం శ్రీ సీతారాముల సన్నిధిలో ప్రత్యేక పూజలు చేసిన వరి విత్తనాలను అచ్యుతాపురం పొలంలో భక్తులు చల్లారు.

ఈ సందర్భంగా భక్తులు శ్రీరాముడు, ఆంజనేయుడు, సుగ్రీవుడు, అంగదుడు, జాంభవంతుడు వంటి వానర వేషాలు ధరించారు. రామనామ సంకీర్తనలతో విత్తనాలకు పూజలు చేసి, నాగలితో పొలం దున్ని విత్తనాలు చల్లారు.

కళ్యాణం అప్పారావు మాట్లాడుతూ, భద్రాచలం, ఒంటిమిట్ట, అయోధ్యలలో శ్రీరామనవమికి జరిగే కళ్యాణానికి ఏటా కోటి తలంబ్రాలను సిద్ధం చేస్తామన్నారు. ఇక్కడ పండిన ధాన్యాన్ని వివిధ ప్రాంతాల భక్తులకు పంపి, వారు గోటితో ఒలిచిన బియ్యాన్ని తలంబ్రాలుగా సమర్పిస్తామని తెలిపారు.