GDPలో R&D పెట్టుబడి 0.64% కే పరిమితం: 2% లక్ష్యం నెరవేరకపోవడం ఆందోళన: టీడీబీ కార్యదర్శి

దేశ స్థూల దేశీయోత్పత్తి (GDP) లో రీసెర్చ్ అండ్ డెవలప్‌మెంట్ (R&D) కు కేటాయించే నిధులు కేవలం 0.64 శాతంగానే కొనసాగుతున్నాయని టెక్నాలజీ డెవలప్‌మెంట్ బోర్డు (TDB) కార్యదర్శి రాజేశ్ పాఠక్ హైలైట్ చేశారు. దేశ ఆర్థిక వ్యవస్థ వృద్ధి చెందుతున్నా, R&D పెట్టుబడి మాత్రం రెండు శాతం లక్ష్యానికి చేరువ కాలేదని ఆయన అభిప్రాయపడ్డారు. 2013 నాటి నేషనల్ సైన్స్ అండ్ టెక్నాలజీ పాలసీ (STI)లోనే 2% లక్ష్యం నిర్దేశించినప్పటికీ, ఇప్పటికీ సాధించలేకపోయామన్నారు. GDP పరిమాణం పెరిగినా, R&D వాటా మాత్రం 0.64% వద్దే నిలిచిపోయింది. దేశంలో ఇన్నోవేషన్, స్వదేశీ టెక్నాలజీ అభివృద్ధి, స్వయం సమృద్ధి కోసం ఈ వ్యయం బాగా పెంచాల్సిన అవసరం ఉందన్నారు. అమెరికా, చైనా, దక్షిణ కొరియా, ఇజ్రాయెల్ వంటి దేశాలు తమ GDPలో 2 నుంచి 4 శాతం వరకు R&D కోసం ఖర్చు చేస్తున్న నేపథ్యంలో భారత్‌ది చాలా తక్కువ. టీడీబీ కార్యదర్శి ఈ విషయాన్ని ఆందోళనగా పేర్కొంటూ, ప్రభుత్వ, ప్రైవేటు రంగాల నుంచి మరింత పెట్టుబడి రావాలని సూచించారు. అయితే దీనికి స్పష్టమైన కార్యాచరణ ప్రణాళిక అమలు కావాల్సి ఉంది.