జయశంకర్ భూపాలపల్లిలో ఆయిల్ పామ్ రైతులతో కేటీఆర్ సమావేశం, తెలంగాణను నెంబర్ వన్ చేయాలని లక్ష్యం

BRS వర్కింగ్ ప్రెసిడెంట్ కేటీఆర్ శుక్రవారం జయశంకర్ భూపాలపల్లి జిల్లాలో ఆయిల్ పామ్ రైతులతో సమావేశమయ్యారు. తెలంగాణను దేశంలో ఆయిల్ పామ్ సాగులో అగ్రగామిగా నిలపాలని, దీని కోసం మాజీ ముఖ్యమంత్రి కెసిఆర్ నిర్దేశించిన 20 లక్షల ఎకరాల లక్ష్యాన్ని అధిగమించాలని ఆయన పేర్కొన్నారు.

BRS హయాంలో 1.5 లక్షల ఎకరాల్లో ఆయిల్ పామ్ సాగు జరిగిందని, ప్రస్తుతం ఇది దాదాపు 3 లక్షల ఎకరాలకు చేరిందని కేటీఆర్ తెలిపారు. ప్రభుత్వం చొరవ తీసుకుంటే 7 లక్షల ఎకరాల వరకు విస్తరించే అవకాశం ఉందన్నారు.

సమావేశంలో హైదరాబాద్‌లోని హెచ్‌సీఎల్‌లో సాఫ్ట్‌వేర్ ఇంజనీర్‌గా పనిచేస్తూ స్వగ్రామంలో 7 ఎకరాల్లో ఆయిల్ పామ్ సాగు చేస్తున్న అనిల్ తన అనుభవాలను పంచుకున్నారు. నాలుగేళ్ల తర్వాత ఎకరానికి 4-5 టన్నుల దిగుబడి వస్తోందని, టన్ను రూ.24,000 చొప్పున ప్రతి 15 రోజులకు ఆదాయం వస్తోందని చెప్పారు. మోహన్ రెడ్డి, సుదర్శన్ రెడ్డి తదితర రైతులు కూడా లాభదాయకంగా సాగు చేస్తున్నామని వివరించారు.

రైతులు పలు సమస్యలను కేటీఆర్ దృష్టికి తీసుకెళ్లారు. కార్మికుల కొరత, యాంత్రీకరణకు సబ్సిడీ, చెట్లు పెరిగిన తర్వాత అదనపు డ్రిప్ లైన్లు, విద్యుత్ లైన్లు వంటివి ప్రధానంగా ఉన్నాయి. దీనికి స్పందించిన కేటీఆర్, బీఆర్ఎస్ తిరిగి అధికారంలోకి వస్తే ట్రాక్టర్ స్లాషర్లు, యంత్రాలపై ఎక్కువ సబ్సిడీ ఇస్తామని, రెండో డ్రిప్ లైన్‌కు ప్రత్యేక సహాయం చేస్తామని హామీ ఇచ్చారు. మలేషియా తరహాలో యాంత్రీకరణ పద్ధతులను అధ్యయనం చేసేందుకు ప్రోగ్రెసివ్ రైతులను అక్కడికి పంపుతామన్నారు.

తెలంగాణ రాష్ట్రంలో 30 ఆయిల్ పామ్ మిల్లులు ఏర్పాటు చేయాలని కెసిఆర్ లక్ష్యంగా పెట్టుకున్నారని, ప్రస్తుతం నిర్మల్‌లో ఒక మిల్లు నిర్మాణంలో ఉందని కేటీఆర్ గుర్తు చేశారు. మిగతా మిల్లులు కూడా దశలవారీగా వస్తాయన్నారు. ప్రస్తుత ప్రభుత్వం ఆయిల్ పామ్ రైతుల పట్ల తగినంత చొరవ చూపడం లేదని ఆయన ఆరోపించారు. దీనిపై ప్రభుత్వం నుంచి స్పందన రావాల్సి ఉంది.