ఆగస్టు 21న 'అమీర్ లాగ్' థియేటర్లలో; కీరవాణి స్వరంతో ప్రత్యేక పాట

హైదరాబాద్‌కు చెందిన 'అమీర్ లాగ్' సినిమా ఆగస్టు 21న థియేటర్లలో విడుదల కానుంది. రమణ రెడ్డి సోమ దర్శకత్వం, నిర్మాణం వహించిన ఈ చిత్రంలో వేదా జలంధర్, ఎంసీ హరి, మనోజ్, శశిధర్ ప్రధాన పాత్రలు పోషించారు.

పూర్తిగా హైదరాబాదీ యాసలో రూపొందిన ఈ సినిమా, ఆ నగర జీవితాన్ని, సామరస్యాన్ని ఆవిష్కరిస్తుంది. హైదరాబాద్‌లో ఉండే అన్ని వర్గాల ప్రజల ప్రేమ, స్నేహ భావాలు సినిమాలో కనిపిస్తాయని రమణ రెడ్డి తెలిపారు.

చిత్రానికి మరో ప్రత్యేకత సంగీతం. ప్రముఖ సంగీత దర్శకుడు ఎం. ఎం. కీరవాణి ఒక పాట పాడారు. ఈ పాట ప్రేక్షకులకు చిరకాలం గుర్తుండిపోతుందని రమణ రెడ్డి చెప్పారు. మొత్తం మీద సినిమాలో 10 పాటలు ఉన్నాయి.

లంగర్ హౌస్, గోల్కొండ, మియాపూర్, గండిపేట్ వంటి ప్రాంతాల్లో 38 రోజుల పాటు షూటింగ్ జరిగింది. డెమో, ప్యాచ్‌తో కలిపి మొత్తం 43-45 రోజుల్లో నిర్మాణం పూర్తయింది. షూటింగ్ సమయంలో స్థానిక ప్రజలు ఎంతో సహకరించారని రమణ రెడ్డి తెలిపారు.

రమణ రెడ్డి సోమ వాస్తవానికి ఆర్కిటెక్ట్. కోవిడ్ లాక్డౌన్ సమయంలో ప్రాంతీయ సినిమాల ప్రభావంతో దర్శకుడిగా మారాలని నిర్ణయించుకున్నారు. ఈ మార్పుకు నాలుగేళ్ల సమయం తీసుకున్నట్లు చెప్పారు.