ఢిల్లీలో దీపావళి తర్వాత వాయు కాలుష్యం ప్రమాదకర స్థాయికి; కొన్ని ప్రాంతాల్లో AQI 1100 దాటింది

దీపావళి తర్వాత ఢిల్లీలో వాయు కాలుష్యం ప్రమాదకర స్థాయికి చేరింది. ఢిల్లీ-NCR లో సగటు AQI 400 మార్కును దాటింది. కొన్ని ప్రాంతాల్లో ఇది 1100 మార్కును కూడా దాటినట్లు ప్రైవేట్ పర్యవేక్షణ సంస్థల గణాంకాలు చెప్తున్నాయి.

సుప్రీం కోర్టు ఆదేశాల ప్రకారం రాత్రి 8 నుంచి 10 గంటల మధ్య గ్రీన్ క్రాకర్స్ మాత్రమే కాల్చాలి. అయితే ప్రజలు రాత్రంతా టపాసులు కాల్చారు. దీంతో తెల్లారేసరికి పలు ప్రాంతాల్లో కాలుష్యం విపరీతంగా పెరిగింది.

పంజాబ్, హర్యానాలో పంట వ్యర్థాల దహనం కూడా కాలుష్యానికి తోడైంది. వాహనాల నుంచి వెలువడే పొగ, భవన నిర్మాణాల దుమ్ము గాలిలో కలిశాయి. చలికాలంలో గాలి వేగం తగ్గడంతో కాలుష్యం చెదరకుండా నిలిచిపోయింది. దీంతో విజిబిలిటీ దాదాపు 500 మీటర్లకు పడిపోయింది.

పిల్లలు, వృద్ధులు ఉదయం, సాయంత్రం బయటికి వెళ్లొద్దని ఆరోగ్య నిపుణులు సూచిస్తున్నారు. శ్వాసకోశ సమస్యల ప్రమాదం ఉందని వారు హెచ్చరిస్తున్నారు. ఈ పరిస్థితి మరి కొన్ని రోజులు కొనసాగే అవకాశం ఉందని నిపుణులు చెప్తున్నారు.

పాఠశాలలు, కార్యాలయాలపై ఇప్పటివరకు ఎలాంటి సర్క్యులర్లు జారీ కాలేదు. రెండు-మూడు రోజులు ఆన్‌లైన్ తరగతులు నిర్వహించే అంశంపై అధికారులు పరిశీలిస్తున్నారు. కార్యాలయాల్లో 50 శాతం సిబ్బందితో alternate day విధులు నిర్వహించే ఆలోచన కూడా ఉంది. ఈరోజు మధ్యాహ్నం లేదా రేపటిలోగా ప్రకటన వచ్చే అవకాశం ఉంది. డిసెంబర్, జనవరిలో పరిస్థితి మరింత దిగజారే అవకాశం ఉందని అధికారులు చెప్తున్నారు.