సిక్కింలో సైనికులతో కలిసి రక్షణ మంత్రి రాజ్‌నాథ్ సింగ్ దీపావళి

సిక్కింలోని సరిహద్దు ప్రాంతం షేరతాంగ్‌లో రక్షణ మంత్రి రాజ్‌నాథ్ సింగ్ సైనికులతో కలిసి దీపావళి జరుపుకున్నారు. సైనికులకు ఆయన మిఠాయిలు పంపిణీ చేశారు. వారితో కలిసి మాట్లాడారు.

ఈ సందర్భంగా ఆయన యుద్ధ స్మారక స్థలిని సందర్శించారు. దేశం కోసం ప్రాణాలు కోల్పోయిన అమర వీరులకు నివాళి అర్పించారు. మాతృభూమి రక్షణలో వారి త్యాగాన్ని గుర్తు చేసుకున్నారు.

మనం ఇళ్లలో దీపాలు వెలిగించుకోగలగడానికి కారణం వీర సైనికుల త్యాగమేనని రాజ్‌నాథ్ సింగ్ అన్నారు. ప్రాణాలను పణంగా పెట్టి దేశ భద్రతను కాపాడుతున్న సైనికుల కుటుంబాలకు ఆయన దీపావళి శుభాకాంక్షలు తెలిపారు.

ఎంత ఆధునిక సాంకేతికత ఉన్నా క్రమశిక్షణ లేకపోతే దాని ప్రయోజనం ఉండదని మంత్రి అన్నారు. సైనికుల క్రమశిక్షణే వారి అతిపెద్ద బలమని పేర్కొన్నారు. షేరతాంగ్, పరిసర ప్రాంతాల్లోని ప్రజలకు సైన్యం పట్ల ఎంతో అభిమానం ఉందని ఆయన చెప్పారు. ఆ అభిమానాన్ని కాపాడుకోవడం సైనికుల బాధ్యత అని అన్నారు.

దేశం పండుగలు జరుపుకునే సమయంలోనూ సైనికులు సరిహద్దుల్లో అప్రమత్తంగా ఉంటున్నారని రాజ్‌నాథ్ సింగ్ గుర్తు చేశారు. ఈ స్మారక స్థలి సైనికుల శౌర్యాన్ని భావి తరాలకు తెలియజేస్తూనే ఉంటుందని ఆయన అన్నారు.