హైదరాబాద్ సదర్ ఉత్సవం: యువరాజ్ 2 సహా 9 దున్నరాజులు ప్రత్యేక ఆకర్షణ

హైదరాబాద్‌లో యాదవుల సంప్రదాయ ఉత్సవమైన సదర్ ఈ నెల 10న ముషీరాబాద్‌లో ప్రారంభం కానుంది. ఈ ఏడాది యువరాజ్ 2 సహా తొమ్మిది దున్నరాజులను ప్రదర్శనకు తీసుకొస్తున్నట్లు నిర్వాహకులు తెలిపారు.

దున్నపోతులను ప్రత్యేకంగా అలంకరించి, వాటి బలాన్ని, ఆకృతిని ప్రదర్శించడం ఈ ఉత్సవాల ప్రధాన ఆకర్షణ. యువరాజ్ 2తో పాటు కలి, మహారాజా బుల్, రాజా బబుల్, కింగ్ బుల్, రోలెక్స్ పేర్లతో దున్నరాజులను హర్యానా నుంచి తీసుకొచ్చినట్లు నిర్వాహకుడు ఎడ్ల హరిబాబు యాదవ్ చెప్పారు.

గతంలో తీసుకొచ్చిన యువరాజు అనే దున్న దేశవాలీ పోటీల్లో జాతీయ స్థాయిలో ఛాంపియన్‌గా నిలిచిందని ఆయన తెలిపారు. 2014 నుంచి 2025 వరకు వివిధ దున్నరాజులను సదర్‌కు తీసుకొచ్చినట్లు చెప్పారు. ఆ దున్నను ప్రధానమంత్రి మోడీ చూసినట్లు కూడా నిర్వాహకులు పేర్కొన్నారు.

దున్నరాజులకు రోజువారీగా పాలు, లివర్ టానిక్, మల్టీవిటమిన్ టానిక్, యాపిల్, అరటిపండ్లు ఇస్తారు. రోజుకు రెండుసార్లు ఆయిల్ మసాజ్ చేస్తారు. పచ్చగడ్డి, జొన్న కుట్టి, మక్క పొడి, కంది, కాటన్ కేక్ కూడా ఆహారంలో ఉంటాయి. వారానికి మూడుసార్లు నెయ్యి ఇస్తారు.

ఒక్కో దున్నరాజు సంరక్షణకు రోజుకు కనీసం ₹5,000 ఖర్చవుతుందని నిర్వాహకులు తెలిపారు. వాటి సంరక్షణ కోసం ఇద్దరు కార్మికులు రోజూ 24 గంటలు అందుబాటులో ఉంటారు.

ఉత్సవం ముషీరాబాద్‌లో మొదలై, అక్కడి నుంచి ర్యాలీగా బయలుదేరుతుంది. దున్నరాజులను చూసేందుకు ఉదయం 4-5 గంటల నుంచే ప్రజలు వేచి ఉంటారని నిర్వాహకులు చెప్పారు. గతంలో ఈ ఉత్సవం హైదరాబాద్‌కే పరిమితమైందని, తెలంగాణ ఏర్పడిన తర్వాత జిల్లాలకూ వ్యాపించిందని వారు పేర్కొన్నారు.