ముచ్చింతల్‌లో చిన్నజీయర్ స్వామి 70వ తిరునక్షత్ర మహోత్సవాలు ప్రారంభం

ముచ్చింతల్ సమతామూర్తి స్ఫూర్తి కేంద్రంలో శ్రీ శ్రీ శ్రీ త్రిదండి చిన్నజీయర్ స్వామి 70వ తిరునక్షత్ర మహోత్సవాలు జరుగుతున్నాయి. యతీంద్ర సప్తతి మహోత్సవాల్లో భాగంగా ఈ నెల 12వ తేదీ వరకు కార్యక్రమాలు కొనసాగుతాయి.

మొదటి రోజు లోకక్షేమం, ప్రపంచ శాంతి, దేశ రక్షణ లక్ష్యంగా ప్రత్యేక పూజలు నిర్వహించారు. ఆధ్యాత్మికత, మానవతా విలువలు, దేశభక్తి, సమాజ సేవను మేళవిస్తూ కార్యక్రమాలు చేపట్టారు. దేశ, విదేశాల నుంచి వేలాదిగా శిష్యులు, భక్తులు, వైష్ణవులు, వేద పండితులు తరలివచ్చారు. వారు స్వామీజీకి శరణాగతి సమర్పించుకున్నారు.

యతీంద్ర సప్తతి కార్యక్రమంలో భాగంగా 36వ, 37వ జియర్ పురస్కారాలను అందజేశారు. వేద ద్రవిడ ప్రబంధాల్లో పాండిత్యం ఉన్న గుడిమెళ్ల మురళీ కృష్ణమాచార్యులకు 36వ జియర్ పురస్కారం లభించింది. జైమిని సామవేదంలో ప్రావీణ్యం ఉన్న ఎన్. మకరభూషణం అయ్యం గారికి 37వ జియర్ పురస్కారం అందజేశారు. సంస్కృత విద్య, పరిశోధన రంగాల్లో సేవలు అందించిన ఆచార్య కందాల వెంకట కృష్ణమాచార్యులకు విద్వన్మణి పురస్కారం ప్రదానం చేశారు.

మై హోమ్ సంస్థల చైర్మన్ డాక్టర్ జూపల్లి రామేశ్వరరావు కుటుంబ సమేతంగా ఈ కార్యక్రమాల్లో పాల్గొన్నారు. 1990 నుంచి తాను స్వామివారి శిష్యుడిగా ఉన్నట్లు ఆయన తెలిపారు. భవిష్యత్తు తరాల కోసం స్వామివారు 'సహస్ర' పేరుతో కొత్త ప్రాజెక్టును ప్రారంభించినట్లు చెప్పారు. భక్తులందరూ ఇందులో భాగస్వాములు కావాలని చిన్నజీయర్ స్వామి సూచించారు.

ఈ మహోత్సవాల్లో BRS నేతలు హరీష్ రావు, ఎర్రబెల్లి దయాకర్ రావు పాల్గొని స్వామివారి ఆశీర్వాదాలు అందుకున్నారు. యతీంద్ర సప్తతి వేడుకల్లో పాల్గొన్నందుకు సంతోషంగా ఉందని హరీష్ రావు తెలిపారు. తాను ఎన్నో ఏళ్లుగా స్వామివారి అనుచరుడిగా సామాజిక సేవా కార్యక్రమాల్లో పాల్గొంటున్నానని ఎర్రబెల్లి చెప్పారు.

రెండో రోజు అంటే రేపు శ్రీమత్ సుందరకాండ పారాయణతో పాటు ఆచార్య వైభవ కార్యక్రమం జరగనుంది. ఈ నెల 10న స్టాచ్యూ ఆఫ్ ఈక్వాలిటీ వద్ద మంగళ తరంగిడి నిర్వహిస్తారు. 11న దేశ సేవలో విశేష త్యాగాలు చేసిన 70 మందికి సమతా పురస్కారాలు అందజేస్తారు. సామాజిక సేవకు అంకితమైన 70 మంది మాతృమూర్తులను సన్మానిస్తారు.

చివరి రోజు అంటే ఈ నెల 12న శ్రీ రామచంద్రుడికి సహస్ర కలసాభిషేకం నిర్వహిస్తారు. దేశంలోని వివిధ ప్రాంతాలకు, విదేశాల్లోని భక్తుల ఇళ్లకు రామ కలసాలను పంపించి ప్రత్యేక పూజలు చేశారు. నెదర్లాండ్స్‌తో పాటు పాకిస్తాన్‌లోని సింధు ప్రాంతం నుంచి కూడా కలసాలు వచ్చాయి. తిరిగి వచ్చిన ఆ కలసాలతో సహస్ర కలసాభిషేకం జరుగుతుంది.