హైదరాబాద్‌లో దీపావళి రాత్రి 10 చోట్ల అగ్ని ప్రమాదాలు, సుమారు 100 మందికి గాయాలు

నిన్న దీపావళి రాత్రి హైదరాబాద్ వ్యాప్తంగా సుమారు 10 ప్రాంతాల్లో అగ్ని ప్రమాదాలు జరిగాయి. కూకట్‌పల్లి, బేగం బజార్, ఉడుగడ్డ తదితర ప్రాంతాల్లో మంటలు చెలరేగాయని అగ్నిమాపక శాఖకు ఫిర్యాదులు అందాయి.

టపాసుల నిప్పు రవ్వలు ఇళ్లలోకి, దుకాణాల్లోకి, టెంట్ హాళ్లలోకి, స్క్రాప్ దుకాణాల్లోకి దూసుకెళ్లడంతో మంటలు అంటుకున్నాయి. దీంతో దుకాణాల్లోని వస్తువులు దగ్ధమయ్యాయి. భారీగా ఆస్తి నష్టం జరిగింది.

రాత్రంతా అగ్నిమాపక శాఖకు వరుసగా కాల్స్ వచ్చాయి. సిబ్బంది ఘటనా స్థలాలకు వెళ్లి మంటలను అదుపు చేయడానికి ప్రయత్నించారు. తెల్లవారుజాము వరకు సహాయక చర్యలు కొనసాగాయి.

ప్రమాదాలకు కచ్చితమైన కారణం ఇంకా తెలియరాలేదు. దీపావళి సందర్భంగా టపాసులు ఎక్కువగా పేలడం, నిప్పు రవ్వలు ఇళ్లలోకి, దుకాణాల్లోకి దూసుకెళ్లడం వల్లే మంటలు చెలరేగి ఉండొచ్చని పోలీసులు అనుమానం వ్యక్తం చేస్తున్నారు. ఇది ప్రాథమిక అంచనా మాత్రమేనని అధికారులు చెబుతున్నారు.

ఉదయం 5:30 గంటల వరకు సుమారు 100 మంది గాయపడిన వారు ఆస్పత్రులకు చేరుకున్నారు. ఎక్కువ మంది సరోజినీ దేవి ఆస్పత్రిలో చికిత్స పొందుతున్నారు. గాంధీ, ఉస్మానియా ఆస్పత్రుల్లోనూ బాధితులకు చికిత్స అందిస్తున్నారు.

గాయపడిన వారిలో చిన్నారులు, మహిళలు, వృద్ధులు, రోడ్డుపై వెళ్తున్న వాహనదారులు ఉన్నారు. కొంతమంది చిన్నారుల కళ్లలో నిప్పు రవ్వలు పడటంతో చూపుపై ప్రభావం పడింది. కొందరికి సర్జరీ అవసరం కాగా, మరి కొందరు ఒక వారం పరిశీలన తర్వాత మందులు వాడితే కోలుకునే అవకాశం ఉందని వైద్యులు చెబుతున్నారు.

గాంధీ ఆస్పత్రిలో చేతులు, వీపుపై కాలిన గాయాలతో బాధితులు చేరారు. తెలంగాణలోని ఇతర ప్రాంతాల నుంచి వచ్చిన కొందరు బాధితులను సరోజినీ దేవి ఆస్పత్రికి పంపారు. నిర్లక్ష్యమే చాలా మందికి ప్రమాదాలు తెచ్చిపెట్టిందని వైద్యులు చెబుతున్నారు.