హైదరాబాద్ మైలార్దేవపల్లిలో వరుసగా రెండు అగ్నిప్రమాదాలు

హైదరాబాద్ మైలార్దేవపల్లి పారిశ్రామిక వాడలో భారీ అగ్నిప్రమాదం జరిగింది. ఒక ప్లాస్టిక్ గోడౌన్‌లో మంటలు చెలరేగాయి. క్షణాల్లోనే పక్కనున్న ప్లైవుడ్ గోడౌన్‌కు కూడా మంటలు వ్యాపించాయి.

భారీ ఎత్తున అగ్నికీలలు ఎగిసిపడ్డాయి. ఆ ప్రాంతమంతా దట్టమైన పొగ కమ్మింది. దీంతో స్థానికులు తీవ్ర భయాందోళనకు గురయ్యారు.

సమాచారం అందుకున్న అగ్నిమాపక సిబ్బంది ఆరు ఫైర్ ఇంజన్లతో ఘటనా స్థలానికి చేరుకున్నారు. మంటలను అదుపు చేశారు.

ఈ మంటలు పూర్తిగా అదుపులోకి రాకముందే మైలార్దేవపల్లిలోని ఉడంగడ్డలో మరో అగ్నిప్రమాదం జరిగింది. ఈవెంట్ సామాగ్రి గోడౌన్‌లో మంటలు చెలరేగాయి. నిప్పురవ్వలు పడడంతో మంటలు అంటుకున్నాయని తెలుస్తోంది.

వెంటనే అప్రమత్తమైన అగ్నిమాపక సిబ్బంది మంటలను ఆర్పే చర్యలు చేపట్టారు. ఒకే ప్రాంతంలో వరుసగా రెండు ప్రమాదాలు జరగడంపై స్థానికులు ఆందోళన వ్యక్తం చేస్తున్నారు.