అనంతపురం రాప్తాడులో విద్యార్థినిపై దాడి.. నిందితుడిపై కఠిన చర్యలు తీసుకుంటామని పోలీసుల హామీ

అనంతపురం జిల్లా రాప్తాడులో ఒక మైనర్ విద్యార్థినిపై దాడి జరిగింది. నిందితుడికి కఠిన శిక్ష పడేలా చర్యలు తీసుకుంటామని రాప్తాడు పోలీసులు తెలిపారు.

స్థానికులు చెప్తున్న దాని ప్రకారం, అదే ప్రాంతానికి చెందిన హేమంత్ ఆ బాలికకు వరుసకు బాబాయి అవుతాడు. ఆమెను పెళ్లి చేసుకోవాలంటూ అతను కొంతకాలంగా వేధిస్తున్నాడని వారు చెప్తున్నారు. బాలిక నిరాకరించడంతో పగ పెంచుకుని ఈ దాడి చేసినట్టు స్థానికులు ఆరోపిస్తున్నారు.

విషయం కుటుంబ సభ్యులకు తెలియడంతో వారు హేమంత్‌ను మందలించారని తెలుస్తోంది. దాన్ని అవమానంగా భావించిన అతను బాలిక ఒంటరిగా ఉన్న సమయం చూసి దాడి చేసినట్టు స్థానికులు చెప్తున్నారు.

హేమంత్ మద్యానికి బానిస అని, అతన్ని రౌడీ షీటర్‌గా స్థానికులు గుర్తిస్తున్నారని తెలుస్తోంది. గతంలో అతను ఒక విద్యార్థి హాస్టల్‌లోకి చొరబడి విద్యార్థులపై దాడి చేసినట్టు స్థానికులు గుర్తు చేస్తున్నారు. ఈ ఘటనపై మహిళా సంఘాలు, విద్యార్థి సంఘాలు ఆందోళన వ్యక్తం చేశాయి. నిందితుడికి బహిరంగ శిక్ష పడాలని వారు డిమాండ్ చేస్తున్నారు.