హైదరాబాద్‌లో అండాల దందా: 49 మంది మహిళల రక్షణ, 8 మంది అరెస్ట్

హైదరాబాద్‌లో అండాలను అక్రమంగా సేకరించి విక్రయించే అంతర్రాష్ట్ర ముఠాను మల్కాజగిరి పోలీసులు పట్టుకున్నారు. ఈ దందాలో చిక్కుకున్న 49 మంది యువతులను పోలీసులు రక్షించారు. ఎనిమిది మంది ప్రధాన నిందితులను అరెస్టు చేశారు.

మల్కాజగిరి పోలీస్ కమిషనర్ సుమతి ఈ వివరాలను వెల్లడించారు. నిరుపేద, మధ్యతరగతి కుటుంబాలకు చెందిన యువతులను ఈ ముఠా లక్ష్యంగా చేసుకుంది. పశ్చిమ బెంగాల్, ఉత్తరప్రదేశ్, మహారాష్ట్ర తదితర రాష్ట్రాల నుంచి వారిని తీసుకొచ్చినట్లు పోలీసులు తెలిపారు.

యువతుల ఆర్థిక ఇబ్బందులను ఆసరాగా చేసుకున్న ఈ ముఠా, ఒక్కొక్కరికి ₹20,000 నుంచి ₹50,000 మాత్రమే చెల్లించింది. సేకరించిన అండాలను మాత్రం IVF సెంటర్లకు దాదాపు ₹3 లక్షల చొప్పున అమ్మింది. ఈ నెట్‌వర్క్ కోట్ల రూపాయలు సంపాదించినట్లు పోలీసులు తెలిపారు.

బేగంపేట, సరూర్‌నగర్, ఎల్‌బీ నగర్ పోలీస్ స్టేషన్ పరిధుల్లో మూడు రిక్రూట్‌మెంట్, అకామడేషన్ సెంటర్లపై దాడులు జరిగాయి. పోలీస్ SOT బృందాలు ఈ దాడుల్లో పాల్గొన్నాయి. ప్రకాష్‌నగర్, బేగంపేట, ఎర్రగడ్డ, సరూర్‌నగర్, గోపాల్‌పురం ప్రాంతాల నుంచి యువతులను రక్షించారు.

ఈ దందా వెనుక కొన్ని IVF సెంటర్ల పాత్ర ఉండవచ్చని పోలీసులు అనుమానిస్తున్నారు. ART Act నిబంధనలకు విరుద్ధంగా హార్మోన్ స్టిమ్యులేషన్ చేసి అండాలు సేకరించినట్లు గుర్తించారు. మెడికల్ ఏజెంట్లు, రిక్రూటర్లు, ఇంటర్మీడియరీలతో కూడిన ఈ నెట్‌వర్క్‌పై పూర్తి విచారణ జరుగుతోందని సిపి సుమతి తెలిపారు.