వరంగల్: పత్తి పొలంలో 50 తులాల పురాతన బంగారు ఆభరణాలు లభ్యం

వరంగల్ జిల్లా చెన్నారావుపేట మండలం కోపాకుల గ్రామంలో ఈ నెల 24న పత్తి పొలంలో కలుపు తీస్తున్న మహిళా కూలీలకు పురాతన బంగారు ఆభరణాలు దొరికాయి. సుమారు 50 తులాల బరువు ఉంటుందని స్థానికంగా ప్రచారం జరిగింది.

ఈ ఆరు ఎకరాల భూమిని 10 ఏళ్ల క్రితం చెన్నారావుపేటకు చెందిన ఒక వ్యక్తి అదే గ్రామ రైతు నుంచి కొనుగోలు చేశారు. ప్రస్తుతం ఈర్యా తండాకు చెందిన ఒక రైతు ఈ భూమిని కౌలుకు తీసుకుని పత్తి సాగు చేస్తున్నారు. కలుపు తీస్తున్న సమయంలో మట్టిలో మెరిసే వస్తువులు కనిపించడంతో కూలీలు వాటిని బయటకు తీశారు. అవి ప్రాచీన కాలం నాటి బంగారు ఆభరణాలుగా గుర్తించారు.

బంగారం లభించిన విషయం తెలుసుకున్న భూ యజమాని కూలీలను పిలిపించి వస్తువులను చూపించాలని కోరారు. అయితే దొరికిన బంగారాన్ని ప్రభుత్వానికి అప్పగించకుండా యజమాని, కూలీలు రహస్యంగా పంచుకున్నారనే ఆరోపణలు వ్యాపించాయి. ఈ నేపథ్యంలో ఐదేళ్ల క్రితం ఈ భూమిని విక్రయించిన మాజీ యజమాని కుమారుడు చెన్నారావుపేట పోలీస్ స్టేషన్‌లో ఫిర్యాదు చేశారు. తమకు చెందిన భూమిలో దొరికిన బంగారాన్ని అక్రమంగా స్వాధీనం చేసుకున్నారని, దాన్ని రికవరీ చేసి తమకు అందించాలని ఆయన డిమాండ్ చేశారు. ప్రస్తుత భూ యజమాని కూడా పోలీసులకు ఫిర్యాదు చేసినట్లు సమాచారం.

చట్టం ప్రకారం భూమిలో దొరికే పురావస్తు నిధులు ప్రభుత్వ ఆస్తి. వాటిని పురావస్తు శాఖకు అప్పగించాల్సి ఉంటుంది. అయితే ఇక్కడ వాటిని దాచిపెట్టినట్లు ఆరోపణలు వచ్చాయి. గతంలో 1991లో ఇదే పొలంలో మరోసారి బంగారం, కొన్నేళ్ల తర్వాత మరో వ్యక్తికి కూడా బంగారం లభించినట్లు గ్రామస్థులు చెబుతున్నారు. ఈ ప్రాంతంలో పూర్వం పెద్ద ఆలయాలు ఉండడంతో గుప్త నిధులు ఉండవచ్చని స్థానికుల నమ్మకం.

ఈ ఘటన తర్వాత రాత్రి వేళల్లో చేతిలో టార్చిలైట్లు, తవ్వే పరికరాలతో కొందరు ఆ పొలం చుట్టూ రహస్యంగా తిరుగుతున్నట్లు తెలిసింది. పోలీసులు రెండు ఫిర్యాదులపై దర్యాప్తు ప్రారంభించారు. పురావస్తు శాఖకు సమాచారం ఇవ్వాలని, దొరికిన వస్తువులను అప్పగించాలని అధికారులు సూచించారు.