వనరుల ఆయుధీకరణపై ప్రధాని మోదీ హెచ్చరిక – ఆత్మనిర్భరత అవసరం

ప్రపంచ దేశాలు వనరులను ఆయుధంగా మారుస్తున్నాయని ప్రధాని నరేంద్ర మోదీ హెచ్చరించారు. పెట్రోల్, డీజిల్, ఎరువులు, మందులు, టెక్నాలజీ చిప్స్‌తో పాటు భూభాగాన్ని కూడా కొన్ని దేశాలు ఆయుధీకరించాయని ఆయన అన్నారు.

ఒకప్పుడు తాను ఆత్మనిర్భరత గురించి మాట్లాడినప్పుడు కొందరు గ్లోబలైజేషన్ ప్రశ్నలు లేవనెత్తారని గుర్తు చేసిన మోదీ, గత దశాబ్దంలో ప్రపంచం గ్లోబలైజేషన్ మాట్లాడటమే ఆపేసిందని తెలిపారు. ప్రతి దేశం తన వనరులను కాపాడుకునే దిశగా అడుగులు వేస్తోందని, కొందరు తమ హోదా చూపించుకునేందుకు వనరులను ఆయుధీకరించే ఆట ఆడుతున్నారని ఆయన వివరించారు.

గత పదేళ్లలో భారత్ ఆత్మనిర్భరత మార్గంలో ముందుకు సాగినందునే ఇలాంటి సవాళ్లను బలంగా ఎదుర్కోగలుగుతోందని ఆయన చెప్పారు. భారత్ స్థిరమైన రాజకీయ మద్దతు, స్థిరమైన ప్రభుత్వం, శక్తివంతమైన ప్రజాస్వామ్యం, బలమైన న్యాయవ్యవస్థ, రాజ్యాంగం ఉన్న దేశమని పేర్కొన్నారు.

2014 తర్వాత భారత్ సుమారు 40 దేశాలతో FTA ఒప్పందాలు చేసుకుంటోందని చెప్పిన మోదీ, ఇది పెద్ద అవకాశమని అన్నారు. ముఖ్యంగా MSME సంస్థలు ఈ అవకాశాన్ని వదులుకోవద్దని సూచించారు. టెక్స్‌టైల్, యంత్రాలు, మందులు సహా భారత ఉత్పత్తులు ప్రపంచ మార్కెట్లోకి చేరాలని ఆయన కోరారు.

అయితే ప్రపంచ ప్రమాణాలను అధిగమించాలని, ప్రపంచానికి మంచి నాణ్యతతో తక్కువ ధరకు ఉత్పత్తులు అందించాలని ఆయన స్పష్టం చేశారు.