కాకినాడలో వరద నీటిలో చిక్కుకున్న కాలనీలు; నివాసితులు రోడ్డుపై నిరసన

కాకినాడలోని పలు కాలనీలు వరద నీటిలో చిక్కుకున్నాయి. వర్షం తగ్గి నాలుగు రోజులు అయినా నీరు పూర్తిగా తగ్గలేదు. దీంతో కాలనీ నివాసితులు రోడ్డుపైకి వచ్చి నిరసన తెలిపారు.

బాధిత నివాసితులు ఐదు రోజులుగా నీటిలోనే ఉంటున్నామని చెప్పారు. తాగునీరు, కనీస అవసరాలు దొరకడం లేదని తెలిపారు. ఇళ్లలోకి పాములు, తేళ్లు, కీటకాలు వస్తున్నాయని వారు ఆందోళన వ్యక్తం చేశారు. పిల్లలు ఆరు రోజులుగా స్కూళ్లకు వెళ్లలేకపోతున్నారని చెప్పారు.

స్థానిక నాయకుల దృష్టికి సమస్య తీసుకెళ్లినా సరైన స్పందన రాలేదని నివాసితులు ఆరోపించారు. కాలనీలు చెరువులా మారడంతో బయటికి వెళ్లేందుకు దారి లేదని వారు తెలిపారు. ఈ విషయంపై అధికారుల స్పందన ఇంకా లభించలేదు.