ములుగు అడవుల్లో నాటుసారా తయారీ కేంద్రాలపై పోలీసుల దాడులు

ములుగు జిల్లా వెంకటాపురం మండలంలోని ముత్తారం అడవుల్లో నాటుసారా తయారీ కేంద్రాలపై పోలీసులు దాడులు చేశారు. ఈ దాడుల్లో సుమారు 106 డ్రమ్ముల నాటుసారాను ధ్వంసం చేసినట్టు పోలీసులు తెలిపారు.

వెంకటాపురం మండలం అడవుల్లో గుట్టుగా నాటుసారా తయారీ జరుగుతున్నట్టు పోలీసులకు సమాచారం అందింది. దీంతో వారం రోజులుగా పోలీసులు దాడులు చేస్తున్నారు. ఈ క్రమంలో వేల లీటర్ల నాటుసారా, పలు తయారీ స్థావరాలు బయటపడ్డాయి.

అడవుల్లో గుంతలు తవ్వి సారాను దాచి ఉంచినట్టు పోలీసులు గుర్తించారు. వాగుల్లోని నీటిలో దాచిన ముడి సరుకును కూడా బయటకు తీసి ధ్వంసం చేశారు. తయారీకి వాడిన ప్లాస్టిక్ డ్రమ్ములను అక్కడికక్కడే దహనం చేశారు.

అడవులను నాటుసారా తయారీకి, నిల్వకు ఉపయోగిస్తుండడంపై ఆందోళన వ్యక్తమవుతోంది. ఈ దాడులపై స్థానికులు హర్షం వ్యక్తం చేస్తున్నట్టు తెలుస్తోంది. వెంకటాపురం పోలీసులు దాడులను కొనసాగిస్తున్నారు.