నాగర్‌కర్నూల్ ఇరిగేషన్ DEE ఇంట్లో ACB దాడులు: ₹100 కోట్ల ఆస్తుల ఆధారాలు

ఆదాయానికి మించిన ఆస్తుల కేసులో నాగర్‌కర్నూల్ జిల్లాలో విధులు నిర్వహిస్తున్న ఇరిగేషన్ అండ్ CAD శాఖ డిప్యూటీ ఎగ్జిక్యూటివ్ ఇంజనీర్ ఆర్. సత్యనారాయణ నివాసాల్లో ACB అధికారులు దాడులు చేశారు. కోర్టు ఆదేశాల మేరకు పది ప్రాంతాల్లో ఏకకాలంలో సోధలు జరిపారు.

హైదరాబాద్‌లోని బైరామల్‌గూడలో ఉన్న మాధవరం సెరెనిటీ గేటెడ్ కమ్యూనిటీలోని ఆయన ఇంటితో పాటు మరో తొమ్మిది ప్రాంతాల్లో దాడులు జరిగాయి. 25 ఎకరాల భూమికి సంబంధించిన పత్రాలు, 50 తులాల బంగారు ఆభరణాలను అధికారులు స్వాధీనం చేసుకున్నారు.

గుర్తించిన ఆస్తుల్లో వనపర్తిలో 25 ఎకరాల వ్యవసాయ భూమి, ఒక ఫార్మ్ హౌస్, తొమ్మిది ఓపెన్ ప్లాట్లు ఉన్నాయి. భార్య, కుటుంబ సభ్యుల పేర్లపై తుక్కుగూడలో దాదాపు ₹7 కోట్ల విలువైన విల్లా ఉంది. కర్మన్‌ఘాట్‌లో ఒక 3BHK ఫ్లాట్, నాగోల్‌లోని రాక్ టౌన్‌లో మరో 3BHK ఫ్లాట్ ఉన్నాయి.

ఆయన, కుటుంబ సభ్యుల పేర్లపై మూడు లేదా నాలుగు కార్లు, ఒక ద్విచక్ర వాహనం ఉన్నాయి. మ్యూచువల్ ఫండ్స్, చిట్స్, పెట్టుబడుల రూపంలో దాదాపు ₹20 లక్షలు గుర్తించారు. LIC, బ్యాంకు పాలసీల వివరాలు ఇంకా సేకరించాల్సి ఉంది.

ప్రభుత్వ విలువ ప్రకారం ఈ ఆస్తుల మొత్తం విలువ దాదాపు ₹5 నుంచి ₹6 కోట్లు ఉంటుందని అధికారులు తెలిపారు. బహిరంగ మార్కెట్‌లో ఇది దాదాపు ₹100 కోట్లు ఉంటుందని అంచనా వేస్తున్నారు. ఆస్తుల వివరాలను అధికారులు నమోదు చేస్తున్నారు.