సీబీఎన్ బ్రాండ్, వేగవంతమైన అనుమతుల వల్లే ఏపీకి పెట్టుబడులు: మంత్రి టీజీ భరత్

విశాఖపట్నంలో జరుగుతున్న CII సమ్మిట్‌లో ఏపీ పరిశ్రమల శాఖ మంత్రి టీజీ భరత్ మాట్లాడారు. సీబీఎన్ బ్రాండ్ చూసి ఏపీకి పెట్టుబడులు వస్తున్నాయని ఆయన అన్నారు.

పెట్టుబడులకు వేగంగా అనుమతులు ఇవ్వడం ఏపీ ప్రత్యేకత అని మంత్రి చెప్పారు. సహజ వనరులు, ఖనిజ సంపద పుష్కలంగా ఉండడం వల్లే పెట్టుబడులు వస్తున్నాయని తెలిపారు.

2024లో ప్రస్తుత ప్రభుత్వం ఏర్పాటైన తర్వాత ఇప్పటివరకు ₹20 లక్షల కోట్ల పెట్టుబడి ప్రతిపాదనలు వచ్చాయని భరత్ తెలిపారు. వాటిలో ₹17 లక్షల కోట్ల ప్రాజెక్టులు గ్రౌండింగ్ దశకు చేరాయని, మిగిలినవి వివిధ దశల్లో ఉన్నాయని ఆయన చెప్పారు.

ప్రాజెక్టుల ఆలస్యంపై ఉదాహరణలు కూడా ఆయన ఇచ్చారు. కర్నూలులోని జయరాజ్ స్టీల్ ప్రాజెక్టు ఐదేళ్లు ఆలస్యమైందని అన్నారు. ఇప్పుడు అనుమతులు, క్లియరెన్సులు వేగంగా జరుగుతున్నాయని తెలిపారు. ArcelorMittal కి EC క్లియరెన్స్ 11 నెలల్లోపే పూర్తి చేశామని మంత్రి చెప్పారు.

ఎన్నికల ముందు 20 లక్షల ఉద్యోగాలు ఇస్తామని చెప్పామని భరత్ గుర్తు చేశారు. ఒక పరిశ్రమ 200 మందికి ఉద్యోగం ఇస్తామని చెబితే, ఆ 200 మందిని చూపించినప్పుడే రాయితీలు, ఇన్సెంటివ్స్ ఇస్తామని ఆయన వివరించారు.

ప్రస్తుత సమ్మిట్ ద్వారా మరో ₹10 లక్షల కోట్ల పెట్టుబడులు వచ్చే అవకాశం ఉందని మంత్రి అన్నారు.