ఏపీ: రేషన్ షాపుల్లో ₹250కే గోధుమపిండి, కందిపప్పు, పామ్ ఆయిల్

ఏపీలో రేషన్ కార్డు ఉన్న కుటుంబాలకు డిసెంబర్ నుంచి గోధుమపిండి, కందిపప్పు, పామ్ ఆయిల్ రేషన్ షాపుల్లో అందుబాటులోకి రానున్నాయి. ఈ మూడు వస్తువులూ కలిపి ₹250కే ఇవ్వాలని రాష్ట్ర ప్రభుత్వం నిర్ణయించింది. రాష్ట్రంలో దాదాపు 1.48 కోట్ల రేషన్ కార్డులు ఉన్నాయి. వీటి ద్వారా సుమారు మూడు కోట్ల మందికి ఈ పథకం లబ్ది చేకూరుతుందని అంచనా.

పథకం ప్రకారం కందిపప్పు కిలో ₹100, గోధుమపిండి కిలో ₹25, పామ్ ఆయిల్ లీటర్ ₹125 చొప్పున ఇవ్వాలని ప్రభుత్వం భావిస్తోంది. మూడు వస్తువులు కలిపి ఒక కుటుంబానికి నెలకు ₹250 అవుతుంది. బయట మార్కెట్‌లో కందిపప్పు కిలో ₹150 నుంచి ₹200 వరకు ఉంది. సాధారణ నాణ్యత కొనాలన్నా కనీసం ₹110 పెట్టాల్సి ఉంటుంది.

సరుకుల సేకరణ పనులు దాదాపు 80 శాతం పూర్తయ్యాయని సమాచారం. కేంద్ర ప్రభుత్వం ధరల స్థిరీకరణ నిధి ద్వారా సుమారు 40 వేల టన్నుల కందిపప్పు రాష్ట్రానికి చేరింది. గోధుమపిండి సేకరణను 3,384 మెట్రిక్ టన్నులతో ప్రారంభించారు. పామ్ ఆయిల్ ఒక లీటర్ ప్యాకెట్లు ఇవ్వాలని అధికారులకు ఆదేశాలు జారీ అయ్యాయి.

ఈ పథకాన్ని డిసెంబర్, జనవరి, ఫిబ్రవరి నెలల పాటు పైలట్ ప్రాజెక్టుగా అమలు చేయాలని ప్రభుత్వం నిర్ణయించింది. మూడు నెలలకు దాదాపు ₹300 కోట్లు కేటాయించేందుకు ఆర్థిక శాఖ ఆమోదం తెలిపింది. పథకం విజయవంతమైతే మరో మూడు నెలలకు పొడిగించే అంశాన్ని పరిశీలిస్తారు. ఫిబ్రవరి మధ్యలో అభిప్రాయాలు సేకరించిన తర్వాత తదుపరి కొనుగోళ్లపై నిర్ణయం తీసుకుంటారు.

ఈ కార్యక్రమాన్ని సివిల్ సప్లై డిపార్ట్‌మెంట్ నిర్వహిస్తుంది. నిత్యవసర వస్తువుల ధరల భారం తగ్గించే లక్ష్యంతో ఈ నిర్ణయం తీసుకున్నట్లు సమాచారం. రేషన్ కార్డుదారులకు డిసెంబర్ నుంచి ఈ సరుకులు అందుతాయని ప్రభుత్వం తెలిపింది.