బుడమేరు వరదల తర్వాతా విజయవాడ VMC ప్రసూతి ఆసుపత్రిలో వైద్య సౌకర్యాలు లేవు

విజయవాడ విద్యాధరపురం లేబర్ కాలనీలోని VMC ప్రసూతి ఆసుపత్రిలో కనీస వైద్య సౌకర్యాలు ఇప్పటికీ లేవు. బుడమేరు వరదల సమయంలో ఈ ఆసుపత్రిలోకి మూడు నుంచి నాలుగు అడుగుల మేర వరద నీరు చేరింది. రెండేళ్లు గడిచినా ఆసుపత్రి పూర్తిగా కోలుకోలేదు.

వరద నీటిలో మునిగి ల్యాబ్ పరికరాలు, ఫార్మసీ, బెడ్లు, కంప్యూటర్లు పాడైపోయాయి. ముఖ్యంగా వ్యాక్సిన్లు నిల్వ చేసే ఫ్రిడ్జ్‌లు దెబ్బతిన్నాయి. వాటిని ఇప్పటివరకు రీప్లేస్ చేయలేదు.

ఆసుపత్రిలో సరైన డ్రైనేజీ వ్యవస్థ లేదు. ఇటీవల కురిసిన వర్షాలకు మళ్లీ ఆసుపత్రిలోకి నీరు చేరింది. దాంతో మూడు రోజుల పాటు వైద్య సేవలు పూర్తిగా ఆగిపోయాయి. ప్రస్తుతం వారంలో రెండు రోజులు మాత్రమే పిల్లలకు వ్యాక్సిన్లు వేస్తున్నారు.

గతంలో వందల మంది రోగులతో రద్దీగా ఉండే ఈ ఆసుపత్రికి ఇప్పుడు రోజుకు 30 నుంచి 40 మంది రోగులు వస్తున్నారు. కనీస అవసరమైన మందులు కూడా లేవని వైద్యులే చెబుతున్నారు. షుగర్ టాబ్లెట్స్, గ్యాస్ టాబ్లెట్స్ అందుబాటులో లేవని ఆసుపత్రి సిబ్బంది తెలిపారు. మచిలీపట్నం నుంచి పంపితేనే స్టాక్ వస్తుందని వారు చెప్పారు.

ఆసుపత్రిలో బెడ్లు ఉన్నా పరుపులు లేవు. దీంతో గర్భిణీలు, సాధారణ రోగులు ఇబ్బందులు పడుతున్నారు. డ్రైనేజీ సమస్యను పరిష్కరించి, అవసరమైన వైద్య సదుపాయాలు కల్పించాలని ప్రజలు కోరుతున్నారు.