ఏపీలో మూడేళ్లలో 5,000 కొత్త ఆలయాలు నిర్మించనున్నట్లు మంత్రి ప్రకటన

ఏపీలో శ్రీవాణి ట్రస్ట్ ద్వారా రాబోయే మూడేళ్లలో 5,000 కొత్త ఆలయాలు నిర్మించనున్నట్లు దేవాదాయ శాఖ మంత్రి ఆనం రామనారాయణ రెడ్డి ప్రకటించారు. ముఖ్యమంత్రి చంద్రబాబు నాయుడు ఆదేశాల మేరకు ఈ ప్రాజెక్టు చేపడుతున్నామని తెలిపారు.

ప్రతి నియోజకవర్గంలో 25 నుంచి 30 ఆలయాలు నిర్మించే ప్రణాళిక ఉంది. ఎమ్మెల్యేలు, ఎంపీలు తమ పరిధిలో ప్రతిపాదనలు పంపించాలని మంత్రి కోరారు. ఆలయ నిర్మాణానికి స్థలం విస్తీర్ణం ఆధారంగా నిధులు కేటాయిస్తారు. 10 సెంట్ల లోపు స్థలం ఉంటే ₹20 లక్షలు, 15 సెంట్లు ఉంటే ₹30 లక్షలు, 20 సెంట్లు ఉంటే ₹40 లక్షలు మంజూరు చేస్తారు. రామాలయం, శివాలయం లేదా అమ్మవారి ఆలయం ఏ రకం అనేది స్థానికుల నిర్ణయం మేరకు నిర్ణయించబడుతుంది.

జిల్లా కలెక్టర్లు ఆలయ నిర్మాణానికి అందుబాటులో ఉన్న ప్రభుత్వ స్థలాలను గుర్తించాలని మంత్రి సూచించారు. ప్రస్తుతం రాష్ట్రంలో శ్రీవాణి ట్రస్ట్ ద్వారా 1,028 ప్రదేశాల్లో ₹200 కోట్ల వ్యయంతో ఆలయాల నిర్మాణం జరుగుతోంది. ఆంధ్రప్రదేశ్‌ను ఆధ్యాత్మిక కేంద్రంగా తీర్చిదిద్దాలనే సంకల్పంతో ముఖ్యమంత్రి ఈ కార్యక్రమం ఆమోదించినట్లు మంత్రి వివరించారు.