తాడేపల్లిలో జగన్ ఇంటి ముందు బోరుగడ్డ అనిల్ నిరసన

తాడేపల్లిలోని వైఎస్ జగన్ నివాసం ముందు బోరుగడ్డ అనిల్ కుమార్ భార్యతో కలిసి నిరసన చేపట్టారు. తనను జగన్ కలవనివ్వకుండా వైసీపీ సీనియర్ నేత సజ్జల రామకృష్ణారెడ్డి అడ్డుకుంటున్నారని ఆయన ఆరోపించారు.

తనపై ఉద్దేశపూర్వకంగా తప్పుడు ప్రచారం చేస్తున్నారని, తనను రౌడీ షీటర్‌గా చూపిస్తున్నారని అనిల్ మండిపడ్డారు. అయితే తనపై ఎలాంటి రౌడీ షీట్ లేదని హైకోర్టు ఇప్పటికే స్పష్టం చేసిందని, 12 మంది పోలీసులకు కోర్టు మెమో జారీ చేసిందని ఆయన తెలిపారు.

ఘటనపై పోలీసులు సంఘటనా స్థలానికి చేరుకొని పరిస్థితిని అదుపులోకి తెచ్చారు. తాను లండన్‌లో చదువుకున్నానని, తండ్రి మరణానంతరం స్వదేశానికి వచ్చి వైఎస్సార్ కుటుంబానికి దగ్గరగా ఉంటూ పార్టీ కోసం పనిచేశానని అనిల్ చెప్పారు.

వైసీపీ మాత్రం బోరుగడ్డ అనిల్‌కు పార్టీతో ఎలాంటి సంబంధం లేదని అధికారికంగా ఇప్పటికే ప్రకటించింది. ఆయన ఆరోపణలపై పార్టీ అధికారిక స్పందన వెలువడాల్సి ఉంది.