విశాఖ HPCL రిఫైనరీలో అగ్నిప్రమాదం: పిచ్ టవర్ ప్లాంట్‌లో మంటలు

విశాఖపట్నం HPCL రిఫైనరీలో భారీ అగ్నిప్రమాదం జరిగింది. పిచ్ టవర్ ప్లాంట్‌లో మంటలు చెలరేగాయి. రిఫైనరీ పరిసరాల్లో దట్టమైన పొగ కమ్ముకుంది.

HPCL ఫైర్ సేఫ్టీ విభాగం వెంటనే అప్రమత్తమైంది. మంటలను ఆర్పే పనులు మొదలుపెట్టింది. సమీపంలోని IOCL సహా ఇతర చమురు పరిశ్రమల ఫైర్ ఇంజన్లు కూడా ఘటనా స్థలానికి చేరుకున్నాయి.

పిచ్ టవర్ ప్లాంట్ ఇంకా నిర్మాణ దశలో ఉంది. కమిషనింగ్ పూర్తి కాలేదు. ట్రైల్ రన్ సమయంలోనే ఈ మంటలు చెలరేగినట్టు ప్రాథమికంగా తెలుస్తోంది. ప్లాంట్‌లోని వ్యర్థ చమురు మండటం వల్లే మంటలు భారీగా ఎగసిపడుతున్నట్టు చెబుతున్నారు. పేలుడు జరిగి ఉంటుందని అధికారులు అనుమానిస్తున్నారు. అగ్నిప్రమాదానికి కచ్చితమైన కారణం ఇంకా తెలియరాలేదు.

ఘటన సమయంలో ప్లాంట్ లోపల ఎవరూ లేరని యాజమాన్యం తెలిపింది. ఎవరికీ గాయాలు కాలేదని పోలీసులు చెప్పారు. మల్కాపురం సీఐ వివరణ ప్రకారం ప్రమాదం ఎవరికీ జరగలేదు. ప్రజలు భయపడాల్సిన అవసరం లేదని ఆయన అన్నారు.

రిఫైనరీకి ఆనుకుని ఉన్న మల్కాపురం, CRP, జయలక్ష్మి కాలనీ ప్రాంతాల ప్రజలు ఆందోళన చెందారు. ఒక్కసారిగా మంటలు భారీగా ఎగసిపడటంతో పొగ ఆ ప్రాంతమంతా వ్యాపించింది. మంటలను ఆర్పే ప్రక్రియ కొనసాగుతోంది. పరిస్థితి నియంత్రణలో ఉందని అధికారులు చెబుతున్నారు.