మునుగోడుకు నిధులు, మంత్రి పదవి ఇవ్వడం లేదు: ఎమ్మెల్యే రాజగోపాల్ రెడ్డి

మునుగోడు నియోజకవర్గానికి నిధులు, మంత్రి పదవి ఇవ్వడం లేదని ఎమ్మెల్యే కోమటిరెడ్డి రాజగోపాల్ రెడ్డి ఆవేదన వ్యక్తం చేశారు. తాను మంత్రి కాకపోయినా మంత్రి కంటే ఎక్కువ అని ఆయన అన్నారు.

మునుగోడు అభివృద్ధి కోసం ₹300 కోట్లు అడిగినా ఇవ్వడం లేదని ఆయన చెప్పారు. ఆర్థిక శాఖ మంత్రి భట్టి విక్రమార్క మునుగోడు బిల్లులను క్లియర్ చేయడం లేదని ఆరోపించారు. పెద్ద నాయకుడిగా ఉండి చిన్న బిల్లులను కూడా క్లియర్ చేయించుకోలేకపోతున్నానని ఆవేదన వ్యక్తం చేశారు.

మంత్రి ఉత్తమ్ కుమార్ రెడ్డి హుజూర్ నగర్‌కు మాత్రమే మంత్రిగా వ్యవహరిస్తున్నారని ఆయన ఆరోపించారు. ఎంతసేపు కోదాడలో ఉంటున్నారు తప్ప తనకు ఏమీ కనిపించడం లేదని ఆయన ప్రశ్నించారు. హుజూర్ నగర్‌లో 100 ఎకరాలకు లిఫ్ట్, మోటార్ పెడుతున్నారని, కానీ మునుగోడుకు అన్యాయం జరుగుతోందని చెప్పారు.

ఇజ్రాయెల్‌లో వర్షపాతం తక్కువగా ఉన్నా పచ్చదనం ఎక్కువగా ఉంటుందని ఆయన పేర్కొన్నారు. మునుగోడుకు ₹200-300 కోట్లు ఇస్తే నియోజకవర్గాన్ని స్వయం సమృద్ధిగా మార్చే బాధ్యత తనదేనని అన్నారు. మూడేళ్లుగా కష్టపడుతున్నా ఒక్క రూపాయి కూడా ఇవ్వడం లేదని, ఫైల్ ముందుకు పోవడం లేదని తెలిపారు.

అధికార పక్షం ఎమ్మెల్యేగా ఉండి ప్రతిపక్షం ఎమ్మెల్యేలా మాట్లాడాల్సి వస్తోందని ఆయన అన్నారు. తన బలమే మునుగోడు ప్రజలకు శాపమైందని ఆవేదన వ్యక్తం చేశారు. ఈ వ్యాఖ్యలపై ఉత్తమ్ కుమార్ రెడ్డి, భట్టి విక్రమార్కల స్పందన తెలియాల్సి ఉంది.