విమాన టికెట్ ధరలపై కేంద్రం కొత్త నిబంధనలు.. 2027 జనవరి 1 నుంచి అమలు

విమాన టికెట్ ధరలు అనూహ్యంగా పెరగకుండా నియంత్రించేందుకు కేంద్ర ప్రభుత్వం భారతీయ వాయుయాన్ అధినియం 2024 నిబంధనలను నోటిఫై చేసింది. ఈ కొత్త నిబంధనలు 2027 జనవరి 1 నుంచి అమల్లోకి రానున్నాయి.

పశ్చిమాసియా ఉద్రిక్తతలతో ఇంధన ధరల్లో మార్పులు రావడంతో విమాన చార్జీలు విపరీతంగా పెరుగుతున్నాయి. ఈ నేపథ్యంలో పౌర విమానయాన శాఖ ఈ నిర్ణయం తీసుకుంది. బ్రిటిష్ కాలం నాటి ఎయిర్‌క్రాఫ్ట్ చట్టం స్థానంలో ఈ కొత్త నిబంధనలను తీసుకొచ్చారు.

అసాధారణ పరిస్థితులు తలెత్తినప్పుడు ప్రజా ప్రయోజనాల దృష్ట్యా ప్రభుత్వం నేరుగా ఆదేశాలు జారీ చేయవచ్చు. టికెట్ ధరలపై గరిష్ట పరిమితి విధించినా వాటిని నియంత్రించే ప్రత్యేక అధికారాలు ప్రభుత్వానికి ఉంటాయి.

విమానయాన సంస్థలు తమ వెబ్‌సైట్లు, డిజిటల్ ప్లాట్‌ఫారమ్‌లలో చార్జీలను పారదర్శకంగా ప్రచురించాలి. విమాన నిర్వహణ ఖర్చుల ఆధారంగా ధరలను నిర్ణయించి DGCA కు సమర్పించాలి. ఆ చార్జీలను DGCA నిరంతరం పర్యవేక్షిస్తుంది.

బుకింగ్ సమయంలో ప్రయాణికులు చెల్లించాల్సిన మొత్తం ధరను స్పష్టంగా చూపించాలి. బేస్ ఫేర్, పన్నులు, రద్దు చార్జీలు, రీఫండ్ వివరాలను విడివిడిగా తెలియజేయాలి.