కార్తిక మాసంలో నాగుల చవితి: సుబ్రహ్మణ్య స్వామి పూజా విధానం, విశిష్టత

నాగుల చవితి కార్తిక మాసంలో శుద్ధ చవితి రోజున వస్తుంది. కార్తిక మాసం మొదలైన నాలుగో రోజున ఈ పండుగ జరుపుకుంటారు. ఈ రోజును సుబ్రహ్మణ్యేశ్వర స్వామి పండుగగా భావిస్తారు.

ఈ రోజున పుట్టలో పాలు పోసి సుబ్రహ్మణ్య స్వామిని పూజిస్తారు. నైవేద్యంగా చలివిడి, చిమ్మిరి, అరటి పండ్లు సమర్పిస్తారు. నాగపాములకు అధిపతి సుబ్రహ్మణ్యేశ్వరుడే అని భక్తుల విశ్వాసం. అందుకే ఆయనను పుట్ట రూపంలో ఆరాధిస్తారు.

ఆలయాల్లో సుబ్రహ్మణ్యేశ్వరుడి విగ్రహాలకు అర్చన, అభిషేకం చేస్తారు. విగ్రహ ప్రతిష్ట జరిగిన తర్వాత ఆలయంలో భగవంతుడు నెలకొంటాడని భక్తుల నమ్మకం. పుట్టలో పాలు పోయడం కూడా ఈ ఆరాధనలో భాగమే.

నాగుల చవితి రోజున భక్తులు ఉపవాసం పాటిస్తారు. పగలంతా ఉపవాసం ఉండి రాత్రి భోజనం చేసేవారు ఉన్నారు. పూర్తి ఉపవాసం చేసి మరుసటి రోజు భోజనం చేసేవారూ ఉన్నారు. పగలు ఒకసారి మాత్రమే తిని రాత్రి ఉపవాసం ఉండే ఏకభుక్తం విధానం కూడా ఉంది. ఈ మూడింటిలో ఒకటి పాటిస్తారు.

పుట్టకు, స్త్రీల గర్భానికి మధ్య సంబంధం ఉందని భక్తులు విశ్వసిస్తారు. సంతాన సమస్యలు లేకుండా ఆరోగ్యకరమైన పిల్లలు కలగాలని మహిళలు మొక్కుతారు. "తండ్రి నాగదేవా, మా కడుపు పండించు" అని ప్రార్థిస్తారు. ఇదే మొక్కును పురుషులూ చేస్తారు.

పుట్టలో పాలు పోసి పూజ చేయడం ద్వారా సంతానాన్ని కాపాడాలని, సంతానం అభివృద్ధి చెందాలని భక్తులు కోరుకుంటారు.