కార్తీక మాసం పూర్తిగా ఆచరించలేని వారు ఏ రోజుల్లో పూజ చేయాలి?

కార్తీక మాసంలో 30 రోజులు పూజలు ఆచరించలేని వారు కార్తీక సోమవారాల్లో శివారాధన చేసుకోవచ్చు. కార్తీక మాసంలో నాలుగు సోమవారాలు ఉంటాయి. ఈ నాలుగు రోజుల్లో పూజా విధానం పూర్తిగా చేసుకోవచ్చు.

నది దగ్గర ఉంటే నదిలో స్నానం చేసి పూజ చేసుకోవచ్చు. లేదా ఇంట్లో తలారా స్నానం చేసి పూజ చేసి, దేవాలయానికి వెళ్లి దైవ దర్శనం చేసుకోవచ్చు. ఉపవాసం శరీర సామర్థ్యాన్ని బట్టి ఉంటుంది. ఉపవాసం కుదరకపోతే భగవంతునికి దండం పెట్టుకుని తమ పనులకు వెళ్లిపోవచ్చు.

కార్తీక పౌర్ణమి, ఏకాదశి, ద్వాదశి వ్రతాలు కూడా ఈ మాసంలో ఉన్నాయి. పూర్తి నెల ఆచరించలేని వారు ఈ పవిత్ర దినాల్లో ఏదైనా ఒక రోజు ఎంచుకుని పూజ చేసుకోవచ్చు.

ఏదీ చేయలేకపోతే కనీసం ఒక పని చేయాలని సూచన. తలారా స్నానం, ఉపవాసం, దానం, దీపం పెట్టడం — వీటిలో ఏది కుదిరినా చేయవచ్చు. ఒక రోజు పూజ చేసినా పుణ్యం కలుగుతుందని, అయితే ఒక్క రోజుతో మోక్షం వస్తుందని చెప్పలేమని తెలిపారు. మానవ జన్మ లభించినందున వీలైనంతవరకు దైవసేవ చేయాలని సూచించారు.