అనిరుద్ధ-కావ్య వివాహం: స్వాభిమాన వివాహ సంప్రదాయం ఏమిటి?

సంగీత దర్శకుడు అనిరుద్ధ రవిచందర్, సన్‌రైజర్స్ హైదరాబాద్ సహ యజమాని కావ్య మారన్ నవంబర్ 11న గ్రీస్‌లో వివాహం చేసుకున్నారు. వీరి వివాహం స్వాభిమాన వివాహ (సెల్ఫ్ రెస్పెక్ట్ మ్యారేజ్) సంప్రదాయంలో జరిగిందని DMK నేత డాక్టర్ టీఆర్‌బీ రాజా తెలిపారు.

ఈ వేడుకలో వధూవరులు ఒకరికొకరు పూలమాలలు మార్చుకున్నారు. ఆ తర్వాత బంగారు గొలుసులు మార్చుకున్నారు. సన్నిహిత కుటుంబ సభ్యులు, స్నేహితుల సమక్షంలో ఈ వివాహం చాలా సరళంగా జరిగిందని ఆయన చెప్పారు. వీరి రిసెప్షన్ నవంబర్ 21న చెన్నైలో జరగనుంది.

తమిళనాడులో సామాజిక సంస్కర్త పెరియార్ ఈవీ రామస్వామి ప్రారంభించిన స్వాభిమాన ఉద్యమం నుంచి ఈ వివాహ పద్ధతి వచ్చింది. కుల వివక్షను, వివాహాల్లో ఖర్చుతో కూడిన మత ఆచారాలను ప్రశ్నిస్తూ ఆయన ఈ విధానాన్ని ప్రవేశపెట్టారు.

ఈ పద్ధతిలో వేద మంత్రాలు లేదా పెద్ద మత ఆచారాలు అవసరం లేదు. పురోహితుడు కూడా తప్పనిసరి కాదు. వధూవరులు పరస్పర అంగీకారంతో వివాహ బంధంలోకి అడుగుపెడుతున్నట్లు ప్రకటిస్తారు. కుటుంబ సభ్యులు, స్నేహితులు సాక్షులుగా ఉంటారు.

1967లో తమిళనాడులో ఈ వివాహ పద్ధతికి చట్టబద్ధ గుర్తింపు లభించింది. హిందూ వివాహ చట్టానికి సవరణ చేసి, సంప్రదాయ మత వేడుకలు లేకుండా ఈ వివాహాలు నిర్వహించుకునే అవకాశం కల్పించారు. ఈ నేపథ్యంలో ప్రముఖ సెలబ్రిటీలు ఈ సంప్రదాయాన్ని ఎంచుకోవడం ప్రస్తుతం చర్చనీయాంశంగా మారింది.