ఢిల్లీలో దట్టమైన స్మాగ్: విజిబిలిటీ తగ్గింపు, ఆరోగ్య ప్రమాద హెచ్చరిక

దేశ రాజధాని ఢిల్లీలో దట్టమైన స్మాగ్ వ్యాపించింది. దీంతో రోడ్లపై విజిబిలిటీ గణనీయంగా తగ్గింది. ఉదయం వేళల్లో ప్రధాన రహదారులు, నివాస ప్రాంతాలపై కాలుష్య పొర కమ్ముకుంది. వాహనదారులు ఎదురుగా వచ్చే వాహనాలను గుర్తించడంలో ఇబ్బంది పడుతున్నారు.

మాన్సింగ్ రోడ్డు, హనుమాన్ రోడ్డు, బారాపుల్ల ఫ్లై ఓవర్ ప్రాంతాల్లో స్మాగ్ తీవ్రత ఎక్కువగా కనిపించింది. ఈ ప్రాంతాల్లో దూరంగా ఉన్న వాహనాలు, భవనాలు స్పష్టంగా కనిపించలేదు. ఉదయం సూర్యకాంతి కూడా మందగించింది. కొన్ని ప్రాంతాల్లో వాహనదారులు హెడ్ లైట్లు వేసుకుని ప్రయాణించాల్సిన పరిస్థితి ఏర్పడింది.

కాలుష్యానికి వాహనాల పొగ, నిర్మాణ పనుల దుమ్ము, పరిశ్రమల ఉద్గారాలు కారణమవుతున్నాయి. శీతాకాలంలో గాలి వేగం తగ్గడంతో కాలుష్య కారకాలు గాలిలో ఎక్కువసేపు నిలిచిపోతున్నాయి. పంట వ్యర్థాల దహనం కూడా కాలుష్యాన్ని పెంచుతోంది.

PM2.5, PM10 వంటి సూక్ష్మ కణాలు పెరగడంతో ఆరోగ్య ప్రమాదం ఉందని వైద్య నిపుణులు హెచ్చరిస్తున్నారు. చిన్నారులు, వృద్ధులు, గర్భిణులు, ఆస్తమా బాధితులపై ఎక్కువ ప్రభావం పడే అవకాశం ఉంది. దగ్గు, గొంతు మంట, కళ్లలో మంట, శ్వాస తీసుకోవడంలో ఇబ్బంది వంటి సమస్యలు రావచ్చని చెబుతున్నారు. అవసరమైతే N95 మాస్క్ ధరించాలని, అనవసరంగా బయటకు వెళ్లకూడదని సూచిస్తున్నారు.

పర్యావరణ నిపుణులు వాహన కాలుష్య నియంత్రణ, నిర్మాణ ప్రాంతాల్లో దుమ్ము తగ్గింపు, ప్రజా రవాణా ప్రోత్సాహం వంటి చర్యలు సూచిస్తున్నారు. ప్రజల ఆరోగ్యాన్ని దృష్టిలో పెట్టుకుని తక్షణ చర్యలు తీసుకోవాలని ఢిల్లీ వాసులు కోరుతున్నారు.