టీచర్ల తప్పనిసరి టెట్ అంశంపై జగన్‌ను కలిసిన ఉపాధ్యాయ సంఘాలు, ప్రత్యేక పరీక్షకు కేంద్రానికి సిఫార్సు చేయాలని వినతి

పాతికేళ్ల సర్వీసు తర్వాత తిరిగి టెట్ రాయాల్సిన పరిస్థితిపై ఏపీ ఉపాధ్యాయ సంఘాలు మాజీ ముఖ్యమంత్రి వైఎస్ జగన్ మోహన్ రెడ్డిని పులివెందులలో కలిశాయి. తమ సమస్యలపై ఆయనకు వినతి పత్రం అందజేశారు.

సర్వీసులో ఉన్న టీచర్ల కోసం ప్రత్యేకంగా టెట్ నిర్వహించేలా కేంద్ర ప్రభుత్వానికి సిఫార్సు చేయాలని, అలాగే కేంద్ర విద్యాహక్కు చట్టంలో సవరణ చేయించేందుకు ఒత్తిడి తేవాలని కోరారు. బీఈడీ పూర్తిచేసి 25 ఏళ్ల క్రితం ఉద్యోగం పొందిన తాము ఇప్పుడు వయసు మీద టెట్ రాయడం సరికాదని టీచర్లు విన్నవించారు.

టీచర్లందరికీ టెట్ అర్హత తప్పనిసరి అని 2025లో సుప్రీంకోర్టు తీర్పు ఇచ్చింది. 2028 ఆగస్టు నాటికి టెట్ ఉత్తీర్ణులు కావాలని ఆదేశించింది. ఏపీలో టెట్ రాయాల్సిన టీచర్ల సంఖ్య సుమారు 80,000గా ఉంది. వీరిలో 50,000 మందికి పైగా ఇటీవల విడుదలైన టెట్ నోటిఫికేషన్‌కు దరఖాస్తు చేసుకున్నారు.

గత ఏడాది నిర్వహించిన టెట్‌లో సర్వీస్ టీచర్లు 31,886 మంది హాజరవగా, 15,239 మంది అర్హత సాధించారు. టీచర్ల సమస్యపై వైఎస్ఆర్సీపీ ఎంపీలు కేంద్ర విద్యాశాఖ మంత్రి ధర్మేంద్ర ప్రధాన్‌తో చర్చిస్తారని జగన్ హామీ ఇచ్చినట్లు సంఘాలు తెలిపాయి.