102 డిగ్రీల జ్వరంతో రింగ్‌లోకి దిగి కామన్వెల్త్ గేమ్స్‌లో అరుంధతీ చౌదరికి స్వర్ణం

రాజస్థాన్‌లోని హడోతీ ప్రాంతానికి చెందిన భారత బాక్సర్ అరుంధతీ చౌదరి కామన్వెల్త్ గేమ్స్‌ 2026లో స్వర్ణ పతకం సాధించారు. ఫైనల్ బౌట్‌కు కొన్ని గంటల ముందు ఆమెకు 102 డిగ్రీల ఫారెన్‌హీట్ జ్వరం వచ్చినా, రింగ్‌లో అద్భుత పోరాటం చేసి విజయం సాధించడం విశేషం. ప్రత్యర్థిని ఓడించిన ఆమె, భారత్‌కు మరో అంతర్జాతీయ పతకాన్ని అందించారు.

ఆమె కుటుంబం ఈ విజయంతో ఆనందంలో మునిగిపోయింది. తల్లిదండ్రులు మాట్లాడుతూ, "గత కొన్నేళ్లుగా అరుంధతీ గాయాలతో ఇబ్బంది పడుతున్నా ఎల్లప్పుడూ ఇంట్లో సంతోషాన్నే నింపేది. ఈసారి గోల్డ్ తెస్తుందనే నమ్మకం ఉండేది," అని చెప్పారు. ఫైనల్ మ్యాచ్ సమయంలో ఆమె తీవ్రమైన నొప్పితో బాధపడుతున్నా ధైర్యంగా పోరాడిందని, టాబ్లెట్లు వేసుకుని బౌట్ పూర్తి చేసిందని కుటుంబ సభ్యులు తెలిపారు. "ఆస్పత్రి నుంచి డిశ్చార్జ్ అయిన వెంటనే నేరుగా గోల్డ్ మెడల్ తీసుకువస్తానని మాకు మాట ఇచ్చింది. ఆమె మాట నిలబెట్టుకుంది" అని వారు భావోద్వేగానికి లోనయ్యారు.

అరుంధతీ సోదరి స్పందిస్తూ, "102 డిగ్రీల జ్వరంలోనూ కామన్వెల్త్ గోల్డ్ గెలవడం చాలా గొప్ప. ఇది ఒక పెద్ద సవాలే, కానీ ఆమె అది చేసి చూపించింది. ఈ విజయంతో ఆమెకు కాన్ఫిడెన్స్ పెరిగి భవిష్యత్తులో మరిన్ని పతకాలు సాధిస్తుందని ఆశిస్తున్నాం" అని చెప్పారు.

ఈ విజయం అనంతరం అరుంధతీకి ఘన స్వాగతం పలికేందుకు హడోతీ ప్రాంత ప్రజలు సిద్ధమవుతున్నారు. నగరవాసులంతా ఆమె రాక కోసం ఎదురుచూస్తున్నారు. అరుంధతీ తదుపరి లక్ష్యం ఒలింపిక్స్‌లో పతకం సాధించడమేనని, అందుకు అవసరమైన శిక్షణపై దృష్టి పెడతానని ఆమె కుటుంబం ద్వారా తెలిసింది.