విజయవాడ కనకదుర్గమ్మ ఆలయంలో ఆషాఢ మాసోత్సవాలు ప్రారంభం

విజయవాడ ఇంద్రకీలాద్రిపై ఉన్న శ్రీ దుర్గా మల్లేశ్వర స్వామి ఆలయంలో ఆషాఢ మాసోత్సవాలు ప్రారంభమయ్యాయి. ఆలయ ఉద్యోగులు అమ్మవారికి మొదటిసారిగా చీర సమర్పించారు.

ఆగస్టు 12 వరకు ప్రతిరోజు అమ్మవారికి పంచవారాహి మంత్రాలతో విశేష పూజలు, హోమాలు నిర్వహిస్తారు. మహామండపం వద్ద ప్రత్యేక వేదికపై అమ్మవారికి చీర సమర్పణ కార్యక్రమం కొనసాగుతుంది.

ఆషాఢ మాసాన్ని వారాహి స్వరూపంగా భావిస్తారు. అమ్మవారు శాంతి స్వరూపంగా ఉండేందుకు మంగళ ద్రవ్యాలు, చలిమిడి సమర్పించడం సాంప్రదాయం. ఈ నేపథ్యంలో సామాన్య భక్తులు సైతం ఈ మాసంలో చీరలు సమర్పించుకునేందుకు ఆలయం అవకాశం కల్పించింది.